Бүгүн, муус устар 20 күнүгэр, Аллараа Бэстээх "Бизнес-инкубатор" киинигэр алын уонна орто урбааны өйүүр сыаллаах муниципальнай бүддьүөттэн көмө харчы көрүү хамыыһыйата ыытылынна.
Улууспутугар туризм сайдарыгар 5, бэйэ дьыалатын сайыннарарга 18 киһи, барыта 13 нэһилиэктэн сайаапка түһэрэн кыттыыны ыллылар. Хамыыһыйа үлэтин улуус баһылыгын тутуу боппуруостарыгар солбуйааччы Василий Филиппов салайан ыытта.
Туризм хайысхатыгар урбаанньыттар сайыҥҥы сөтүөлүүр сирдэри тупсаран, араас хабааннаах тутууну ыытыы, саха төрүт дьарыгын, олоҕун көрдөрөн сылгынан туру тэрийии, тэрээһиннэри ыытар сынньалаҥ киинэ, доруобуйаларыгар хааччахтаах дьоҥҥо табыгастаах сынньанар сир бырайыактаах кытыннылар.
Бэйэ дьыалатын сайыннарыыга кыһыл, үрүҥ көмүстэн ювелирнай оҥоһуктары оҥоруу, сибэкки маҕаһыына, сип панель оҥорон таһаарыы, тииһи эмтиир клиника, тимиринэн, маһынан уһаныы, эт астан полуфабрикаттары оҥоруу, тирии мастарыскыайа, массыынаны өрөмүөннүүр сиэрбис, ынах сүөһү, сылгы иитиитэ, хортуопуй олордуутА сынньанар дьиэ, геодезическэй инженернэй чинчийии, хомус оҥоруу урбаан бырайыактарын истии буолла.
Бу курдук олус интэриэһинэй, араас хайысхалаах үлэлэр кытыннылар. Хамыыһыйа чилиэттэрэ табыгастаах диэбит бизнес-былааннары өйүөхтэрэ, түмүгү сарсын биллэрэллэр.
Мэҥэ Хаҥалас улууһун дьаһалтатын пресс-сулууспата
Информационный сайт Нижний Бестях. Позиция редакции не всегда совпадает с точкой зрения авторов. При перепечатке текстов либо ином использовании текстовых материалов с настоящего сайта на иных ресурсах в сети Интернет гиперссылка на источник обязательна.
В титульной части сайта использованы фотографии Светланы Ивановой, лицензия CC-BY-SA-3.0