Муус устар 12-14 күннэригэр, Москва куорат Крокус Экспо выставочнай комплексыгар Москватааҕы норуоттар икки ардыларынааҕы XXXI ветеринардар конгресстара ыытылынна.
Манна 256 куораттан 4000 кэриҥэ үлэлии-хамсыы сылдьар исписэлиистэр кэлэн кыттыыны ыллылар. Араас тиэмэлэринэн арахсан 300 үрдүк квалификациялаах лиэксийэ ааҕааччылар Арассыыйаттан, Беларусияттан, Италияттан, Испанияттан, Кытайтан, Таилантан кэлэн дакылаат аахтылар.
Биһиги өрөспүүбүлүкэбититтэн 4 исписэлиис дэлэгээт быһыытынан кытынна. Икки дэлэгээт биһиги улууспутуттан, ветеринария салалтатын начаалынньыга Саргылана Тополина, Хаптаҕайдааҕы ветеринарнай учаастак сэбиэдэссэйэ Аграфена Миронова уонна Амма улууһун ветеринариятын салалтатын начаалынньыга Игорь Анисимов, Амматааҕы ветеринария учаастагын сэбиэдиссэйэ Светлана Анисимова кыттыыны ыллылар.
Конгресска 30-тан тахса анал салааларынан арахсан ветеринарнай медицина араас клиническэй хайысхаларынан ситиспит үрдүк көрдөрүүлэрин иһитиннэрдилэр. Дьиэ кыылларыгар, сылгыга аһылык, эмп-том, ветеринарнай, лабораторнай тэриллэри оҥорон таһаарар бастыҥ компаниялар үлэлэрин кэпсээтилэр. Ону тэҥэ, бэйэлэрин салааларыгар бастыҥнар брифинг-саалаларга түмсэн, ыыппыт үлэлэрин, кэтээн көрүүлэрин түмүгүн, ситиһиилэрин иһитиннэрдилэр.
Маннык үрдүк таһымнаах ветеринардар түмсүүлэриттэн биһиги улуус дэлэгээттэрэ инники үлэлэригэр туһалаах буоларын туһуттан элбэх билиини, уопуту, саҥа көрүүнү ылан өрө көтөҕүллэн, астынан кэллилэр.
Мэҥэ Хаҥалас улууһун дьаһалтатын пресс-сулууспата
Информационный сайт Нижний Бестях. Позиция редакции не всегда совпадает с точкой зрения авторов. При перепечатке текстов либо ином использовании текстовых материалов с настоящего сайта на иных ресурсах в сети Интернет гиперссылка на источник обязательна.
В титульной части сайта использованы фотографии Светланы Ивановой, лицензия CC-BY-SA-3.0