Күн иккис аҥарыгар Мэҥэ Хаҥалас улууһугар аан бастакытын Муниципальнай сулууспа бастыҥ үлэһитэ куонкурус ыытылынна.
Бу күрэххэ Майа сэлиэнньэтин дьаһалтатын сүрүннүүр исписэлииһэ Валентина Неустроева, Аллараа Бэстээх бөһүөлэгин дьаһалтатын сүрүннүүр исписэлииһэ Вероника Сергеева, 1-кы Наахара нэһилиэгин тыа сирин түөлбэтин дьаһалтатын сүрүннүүр исписэлииһэ Саргылана Макарова уонна Хара нэһилиэгин тыа сирин түөлбэтин дьаһалтатын сүрүннүүр исписэлииһэ Ольга Елегяева кыттыыны ыллылар.
Үс түһүмэхтээх күрэххэ кыттааччылар үлэлэрин, олохторун сырдатар эрдэ бэлэмнээбит устууларынан бэйэлэрин билиһиннэрдилэр, ким ырыа ыллаан, ким үҥкүүлээн, чабырҕахтаан, иис, кыл оҥоһуктарын аҕалан, араас минньигэс бүлүүдэлэри тоһуйан талааннарын, дьоҕурдарын көрдөрдүлэр уонна үһүс түһүмэххэ үлэлэрин сүнньүнэн ыйытыктарга хоруйдаатылар.
Дьүүллүүр сүбэ ырытыһыы кэнниттэн уопсай сүбэнэн маннык түмүгү таһаарда: 1 миэстэ - сүүрбэттэн тахса сыл муниципальнай сулууспаҕа үлэлээбит Аллараа Бэстээх дьаһалтатын исписэлииһэ Вероника Сергеева; 2 миэстэ - 1-кы Наахара дьаһалтатын исписэлииһэ Саргылана Макарова; 3 миэстэ - Майа дьаһалтатын исписэлииһэ Валентина Неустроева; 4 миэстэ - Хара нэһилиэгин дьаһалтатын исписэлииһэ Ольга Елегяева.
Улууспутугар бастакытын ыытыллар муниципальнай сулууспа бастыҥ үлэһитин быһаарар куонкурус олус тэрээһиннээхтик, сэргэхтик ыытылынна.
Бары кыттааччыларга көхтөөх кыттыыларын иһин махтанан туран, инники үлэлэригэр үрдүк ситиһиилэри баҕарабыт!
Мэҥэ Хаҥалас улууһун дьаһалтатын пресс-сулууспата
Информационный сайт Нижний Бестях. Позиция редакции не всегда совпадает с точкой зрения авторов. При перепечатке текстов либо ином использовании текстовых материалов с настоящего сайта на иных ресурсах в сети Интернет гиперссылка на источник обязательна.
В титульной части сайта использованы фотографии Светланы Ивановой, лицензия CC-BY-SA-3.0