Муус устар 26 күнүгэр Мэҥэ Хаҥалас улууһун кээпэрэтииптэрин уонна бааһынай хаһаайыстыбаларын Ассоциациятын түмсүүтэ ыытылынна. Мунньахха 28 бааһынай хаһаайыстыбалар уонна кээпэрэтииптэр салайааччылара кыттыыны ыллылар.
Мунньаҕы тыа хаһаайыстыбатын салалтатын салайааччыта Иннокентий Семенов салайан ыытта. Саха сирин кээпэрэтииптэрин уонна бааһынай хаһаайыстыбаларын Ассоциациятын толорооччу дириэктэрэ Зарема Бочкарева Ассоциация ыытар үлэтин, инники былааннарын билиһиннэрдэ. Москва куоракка ыытыллыбыт Арассыыйа кээпэрэтииптэрин уонна бааһынай хаһаайыстыбаларын Ассоциациятын XXXIV сийиэһин туһунан биһиги улууспут дэлэгээттэрэ Тимур Десяткин уонна Денис Жирков иһитиннэрдилэр.
Бу түмсүү сүрүн сыала Мэҥэ Хаҥалас Ассоциациятын бэрэссэдээтэлин талыы буолла. Хандьыдааттарынан Доллу нэһилиэгиттэн Тимур Десяткин, 1-кы Наахараттан Наталья Данилова, 2-с Наахараттан Владимир Васильев уонна Мэҥэ нэһилиэгиттэн Ньургун Габышев турунан мустубут дьоҥҥо бэйэлэрин сыалларын-соруктарын, үлэҕэ көрүүлэрин кэпсээтилэр.
Хандьыдааттары истии кэнниттэн, тыа хаһаайыстыбатыгар өр сылларга үлэлээбит дьон бэйэлэрин санааларын этиннилэр. Куоластааһын түмүгүнэн Мэҥэ Хаҥалас улууһун кээпэрэтииптэрин уонна бааһынай хаһаайыстыбаларын Ассоциациятын бэрэссэдээтэлинэн 19 куолаһы ылан Ньургун Габышев талылынна. Толорооччу дириэктэринэн улуус тыа хаһаайыстыбатын исписэлииһэ Нюргуяна Семенова ананна.
Мэҥэ Хаҥалас улууһун дьаһалтатын пресс-сулууспата
Информационный сайт Нижний Бестях. Позиция редакции не всегда совпадает с точкой зрения авторов. При перепечатке текстов либо ином использовании текстовых материалов с настоящего сайта на иных ресурсах в сети Интернет гиперссылка на источник обязательна.
В титульной части сайта использованы фотографии Светланы Ивановой, лицензия CC-BY-SA-3.0