Мэҥэ Хаҥалас улууһугар Саха Өрөспүүбүлүкэтин төрүттэммит күнүгэр ытыктыыр биир дойдулаахтарбыт, өрөспүүбүлүкэбит сайдыытыгар улахан өҥөлөөх тумус туттар салайааччыларбыт үтүө ааттарыгар сүгүрүйэр, оҕолорго өйдөтөр-үөрэтэр сыаллаах үөрүүлээх тэрээһиннэргэ улууспут баһылыгын тутууга солбуйааччы Василий Филиппов кыттыыны ылла. Ыччаттарга туһаайан улуу дьоммут холобурдарынан, үөрэххэ, үлэҕэ үгүс ситиһиилэрдээх, төрөөбүт дойдуларын дьиҥнээх патриоттара буола үүнэн-сайдан тахсалларыгар баҕарда.
Ол курдук, бас-көс дьоммут Майаҕа Филипп Гаврильевич Охлопков, Иван Гаврильевич Тимофеев, Хараҕа Иннокентий Гаврилович Игнатьев уонна Айаал Иванович Степанов бүүстэригэр сибэкки дьөрбөтүн ууруу сиэрэ-туома ыытылынна.
Ону тэҥэ улуус дьаһалтатын тэрийэр үлэни уонна кадрдары салайар салаа салайааччыта Станислав Захаров М.Е. Попов аатынан Аллараа Бэстээхтээҕи орто оскуола үөрэнээччилэрин эҕэрдэлээтэ, үөрүүлээх линейкаҕа, кылаас чааһыгар кыттыыны ылла.
Бу күн улууспут оскуолаларыгар киэҥ далааһыннаахтык бэлиэтэнэр. Үөрүүлээх линейка, кылаас чаастара, маастар кылаастар, биктэриинэлэр, радиорубканан эҕэрдэлэр, онтон да атын араас тэрээһиннэр ыытыллаллар, үөрэнээччилэр сахалыы таҥнан кэлэн, Сахабыт сирин Өрөгөйүн ырыатын толороллор. Оҕону-ыччаты төрөөбүт дойдуну таптыырга, дьонунан-сэргэтинэн киэн туттарга иитэр үлэ ыытыллара хайҕабыллаах.
Тапталлаах Сахабыт сирэ, үүнэ-сайда, чэчирии тур!
Мэҥэ Хаҥалас улууһун дьаһалтатын пресс-сулууспата
Информационный сайт Нижний Бестях. Позиция редакции не всегда совпадает с точкой зрения авторов. При перепечатке текстов либо ином использовании текстовых материалов с настоящего сайта на иных ресурсах в сети Интернет гиперссылка на источник обязательна.
В титульной части сайта использованы фотографии Светланы Ивановой, лицензия CC-BY-SA-3.0