Билигин Аан дойду үрдүнэн төһө да уустук кэмнэр турдаллар, Сахабыт норуотун көҥүл дьылҕатын быһаарбыт муус устар 27 күнэ ураты тутуллан бэлиэтэнэр.
Бу күн улуус баһылыгын бастакы солбуйааччы Василий Михайлов Өрөспүүбүлүкэбит сайдыытыгар сүҥкэн кылааттарын киллэрбит чулуу биир дойдулаахтарбыт, ытык дьоммут үтүө ааттарын, сыралаах үлэлэрин, үрдүк ситиһиилэрин уруйдуур үөрүүлээх миитиҥҥэ кыттыыны ылла.
Ол курдук, 1-кы Тыыллыма нэһилиэгин орто оскуолатыгар Саха сиригэр бырамыысыланнас, тырааныспарнай систиэмэ, үрдүк үөрэх эйгэтэ сайдыытыгар үлэлэспит, биллиилээх уопсастыбаннай-политическэй диэйэтэл Семен Захарович Борисов пааматынньыгар,
Майа сэлиэнньэтин В.П. Ларионов аатын сүгэр орто оскуолаҕа Арассыыйа учуонайа, машиностроение салаатын исписэлииһэ, саха норуотуттан Арассыыйа Наукатын Академиятын бастакы академига, техническэй наука доктора, профессор Владимир Петрович Ларионов пааматынньыгар,
Аллараа Бэстээх тырааныспар техникумугар Саха Өрөспүүбүлүкэтин судаарыстыбаннай мунньаҕын - Ил Түмэн дьокутаата, СӨ үтүөлээх тутааччыта, СӨ судаарыстыбаннай премиятын лауреата, Мэҥэ Хаҥалас улууһун, Дьаҥхаады, Төҥүлү, Нөөрүктээйи, 3-с Мэлдьэхси нэһилиэктэрин бочуоттаах олохтооҕо, РФ дуобакка федерациятын вице - президенэ, РФ олох - дьаһах уонна коммунальнай хаһаайыстыбатын үтүөлээх үлэһитэ Александр Афанасьевич Романов пааматынньыгар сүгүрүйэн туран тыыннаах сибэкки дьөрбөлөрүн уурда.
Бүгүн биһиги үтүөкэннээх судаарыстыбаннай уонна уопсастыбаннай деятеллэри махтана ахтан-санаан ааһабыт. Бу күн ытык дьоммут тустаах кэмҥэ бэлиитикэҕэ хорсуннарынан, төрөөбүт сирдэригэр бэриниилээхтэринэн судаарыстыбаннаһы төрүттээбиттэрэ үйэлэргэ өлбөөдүйбэккэ ахтылла туруохтара диэн эрэнэбит.
Тапталлаах өрөспүүбүлүкэбит сылтан сыл, күнтэн күн үүнэ-сайда, чэчирии турдун!
Мэҥэ Хаҥалас улууһун дьаһалтатын пресс-сулууспата
Информационный сайт Нижний Бестях. Позиция редакции не всегда совпадает с точкой зрения авторов. При перепечатке текстов либо ином использовании текстовых материалов с настоящего сайта на иных ресурсах в сети Интернет гиперссылка на источник обязательна.
В титульной части сайта использованы фотографии Светланы Ивановой, лицензия CC-BY-SA-3.0