Улууспут олохтоохторо клещка ыстатан быраас көмөтүн көрдөөбүттэрэ бэлиэтэннэ.
Ол курдук, Хаптаҕай олохтооҕо Сочи куораттан, Аллараа Бэстээх олохтооҕо Благовещенскай куораттан кэлэн бараннар, клещ ытырса сылдьарын өйдөөн көрбүттэр.
Клещ ытырар түгэнигэр араас ыарыыга хаптарыахха сөп, чуолаан иксодовай клещтар элбэх ыарыыны (клещевой энцефалит, болезнь Лайма (клещевой боррелиоз), моноцитарный эрлихиоз, бабезиоз, геморрагическай лихорадка) тарҕатааччыларынан буолаллар.
Клещ баар сирэ сылтан сыл Арассыыйаҕа кэҥээн иһэр. Ордук хатыҥ чараҥҥа баар буолар. Сүрүннээн төбөҕө, көхсүгэ, сымнаҕас сирдэринэн ытырар.
Клещ ытырдаҕына, ыарыы вируһа киһи хааныгар киирэн, киин ниэрбэ систиэмэтигэр тиийэн киһи хамсыыр нейроннарын алдьатар. Клещ ытырбытын кэннэ ыарыы 30 күҥҥэ диэри биллибэт буолуон сөп, үксүн 7-14 хонук иһигэр киһи ыалдьыбыта кыраадыһа үрдээн, сэниэтэ эстэн, былчыҥнара ыалдьан биллэрэр. Онтон салгыы ыарахан турукка киллэрэр.
Клещтан көмүскэнэр миэрэлэринэн сэрэтэр уонна харыстанар быһыыны туруортарыы, тыаҕа тахсарга сырдык таҥаһы кэтэн үөн-көйүүр киирбэт гына бүөлэнии, эти-сиини көрүнүү буолар.
Өскөтүн клещ ытырбыт буоллаҕына, бэйэҕит күүскүтүнэн араара сатаабакка, балыыһаҕа ыллара бараргыт тоҕоостоох.
Клещтан сэрэхтээх буолуҥ!
Мэҥэ Хаҥалас улууһун дьаһалтатын пресс-сулууспата
Информационный сайт Нижний Бестях. Позиция редакции не всегда совпадает с точкой зрения авторов. При перепечатке текстов либо ином использовании текстовых материалов с настоящего сайта на иных ресурсах в сети Интернет гиперссылка на источник обязательна.
В титульной части сайта использованы фотографии Светланы Ивановой, лицензия CC-BY-SA-3.0