Рекламный баннер 728x90px main1
УЛУУСКА НЬҮӨЛСҮТҮҮ БЫЛААНА 100 БЫРЫҺЫАН ТУОЛЛА
Сааскы халаан уутун хаайан, оттуур ходуһалары ньүөлсүтүүнү сылын ахсын Илин эҥэрдээҕи сири мелиорациялааһын уонна тыа хаһаайыстыбатын уунан хааччыйыы салалтата үлэни тэрийэн ыытар. Бу туһунан Уунан хаччыйыы салаатын начаалынньыга Леонид Борисов сиһилии иһитиннэрдэ.
Хорообут систиэмэтигэр 1604 га иэннээх сир халытыллан, ньүөлсүтүллэр хонууга туолан, билиҥҥи кэмҥэ уутун ыыта турабыт. Моорук нэһилиэгэр «Плотина Шестакова» систиэмэҕэ 550 га иэннээх сир халытылынна.
Бу систиэмэлэргэ үрдүкү салалталар сөпкө өйдөөн, кэмигэр хапытаалынай, тута өрөмүөннүүр үлэлэр бара турар буоланнар, Моорук уонна Хорообут олохтоохторо сылын аайы өлгөм оту оттуу олороллор. Ону тэҥэ араас нэһилиэктэргэ баар 9 гидротехническай сооружениеларга сааскы халаан уутун кэмигэр төгүрүк суукканы эргиччи дьуһуурустубалар олохтонон үлэлэрин түмүктээн эрэллэр.
Уу балысханнык кэлэн, күөллэр ууларын таһымнара үрдээн, сифоннары холбоон регулировкалааһын үлэлэрэ оҥоһулуннулар. Кэккэ эбийиэктэргэ кууллаах буорунан сооружениены бөҕөргөтөөһүн үлэлэрэ ыытылыннылар.
Маны таһынан үрэхтэр орто кээмэйтэн элбэх ууну киллэрэннэр, Бэдьимэлэр уонна Суола Мэлдьэхсилэр тустаах кэмҥэ сөпкө хамсанан, күөллэрин толортооннор үөрүүлэрэ үгүс.
Түгэни туһанан наадалаах кэмҥэ туора турбакка, субуотунньуктарга үлэлэспит бары нэһилиэктэр олохтоохторугар махталбытын тиэрдэбит.
Мэҥэ Хаҥалас улууһун дьаһалтатын пресс-сулууспата
632
Рекламный баннер 728x90px main2