Дойду Президенэ олохтообут Хаарбах дьиэттэн дьону көһөрүү программа биһиги улууска тэтимнээхтик үлэлиир, сылын ахсын бу программаҕа хапсыбыт улууспут олохтоохторо саҥа дьиэ күлүүһүн тутаннар үөрүүлэрэ муҥура суох.
Бэс ыйын 27 күнүгэр, биһиги улууспутугар, Арассыыйа Федерациятын бырабыытылыстабытынан сири-уоту сайыннарарга, дьон олорор дьиэтин-уотун тупсарарга ананан тэриллибит Территориялар сайдыыларын фондата генеральнай дириэктэрэ Андрей Шелковый саҥа тутулла турар эбийиэктэр үлэлэрин хаамыытын кытары билистэ.
Федеральнай таһымнаах салайааччыга, улуус баһылыга Дмитрий Тихонов тутуллан эрэр саҥа дьиэлэри көрдөрдө. Аллараа Бэстээххэ икки дьиэ бу сыл бүтүүтэ үлэҕэ киириэхтээхтэр. Бастакы дьиэ 5 этээстээх, 41 квартиралаах. Иккис дьиэ 5 этээстээх, 26 квартиралаах, онтон 11 квартира тулаайах оҕолорго ананар уонна хаалбыт 15 квартира хаарбах дьиэттэн көһөр дьоҥҥа туһуланар, тас өттүгэр иилии суоллаах, оҕо былассаакалаах, сэтиньигэ туттарылллан ахсынньыга дьон көһөн киирэрэ күүтүллэр диэн, улуус баһылыга Андрей Шелковайга сырдатта. Үлэ күөстүү оргуйар. Бу дьиэлэри ООО Дайкири итиэннэ ООО Сталь тутуу тэрилтэлэрэ туталлар.
Салгыы дэлэгээссийэ Майа сэлиэнньэтигэр айаннаата. Исаева, Байкалова уонна Советская ааттарынан уулуссаларга саҥа тутулла турар үс дьиэни көрдүлэр. Исаева 1/3 (40 квартира) Арктика-Строй, Советская 3/1 ( 60 квартира, онтон хаарбах дьиэттэн көһөрүүгэ - 58 квартира) ПК Мегинстрой, Байкалова 10 (70 квартира) ПК Мегинстрой. Тутууну олохтоохтук ыыталлар.
Салайааччы тутуу хаамыытын түргэтэтэргэ, дьон кэмигэр үрдүк хаачыстыбалаах аныгылыы оҥоһуулаах дьиэлэргэ киириэхтээхтэрин өссө төгүл тоһоҕолоон бэлиэтээтэ, олохтоох тутааччыларга ситиһиини баҕарда.
Дьоммут-сэргэбит олорор усулуобуйалара тупсарын туһугар улууспут федеральнай бырагырааммаларга киирсэн, иннин диэки эрэллээхтик хардыылыыр.
Мэҥэ Хаҥалас улууһун дьаһалтатын пресс-сулууспата
Информационный сайт Нижний Бестях. Позиция редакции не всегда совпадает с точкой зрения авторов. При перепечатке текстов либо ином использовании текстовых материалов с настоящего сайта на иных ресурсах в сети Интернет гиперссылка на источник обязательна.
В титульной части сайта использованы фотографии Светланы Ивановой, лицензия CC-BY-SA-3.0