Саха Сирин биллиилээх атыыһыта, уопсастыбанньык, меценат, саха норуотун бастакы интеллегенциятын биир чаҕылхай бэрэстэбиитэлэ, үгүс дьону сырдыкка-билиигэ сирдээбит, үөрэххэ кынаттаабыт киэн туттар чулуу киһибит, биир дойдулаахпыт Гавриил Васильевич Никифоров - Манньыаттаах уолун аатын, олорон ааспыт дьиэтин-уотун үйэтитэр сыаллаах пуонда арыллан үлэтин саҕалаата.
Бэҕэһээ, от ыйын 19 күнүгэр, пуонда тэрийээччилэрэ улуус баһылыгын Дмитрий Иванович Тихоновы кытта көрсөн үлэлэрин былаанын билиһиннэрдилэр.
Мунньахха 1-кы Тыыллыма нэһилиэгин баһылыга Афанасьев Руслан Васильевич,
Манньыаттаах уолун ини-биитин Атыыһыт Байбал сыдьааннара
Васильева Светлана Аркадьевна (Дьокуускай), Чабыкин Василий Васильевич (Амма), Никифоров Георгий Васильевич (Мэҥэ Хаҥалас) кыттыыны ыллылар,
пуонда үлэтин саҕалаатылар.
Салайааччынан Мэҥэ Хаҥаластааҕы кыраайы үөрэтэр түмэл дириэктэрэ Михаил Иванович Масаха ананна.
Маҥнай утаа пуонда үлэтин Манньыаттаах өтөҕүн сөхсүтүүттэн, балаҕанын чөлүгэр түһэрииттэн саҕалыаҕа. Онтон салҕыы, Гавриил Васильевич бэйэтин кэмигэр үөрэҕириигэ үгүс сыратын уонна кыаҕын анаабытын курдук билии-үөрэх туһугар үлэлиэхтээх.
Үтүө кэскиллээх тэрээһин, чулуу тумус туттар киһибит сырдык аатын ааттатан оҕолорбутун-ыччаттарбытын билии-көрүү киэҥ аартыгар, сырдыкка-кэрэҕэ сирдээтин!
Мэҥэ Хаҥалас улууһун дьаһалтатын пресс-сулууспата
Информационный сайт Нижний Бестях. Позиция редакции не всегда совпадает с точкой зрения авторов. При перепечатке текстов либо ином использовании текстовых материалов с настоящего сайта на иных ресурсах в сети Интернет гиперссылка на источник обязательна.
В титульной части сайта использованы фотографии Светланы Ивановой, лицензия CC-BY-SA-3.0