От ыйын 22 күнүгэр Төҥүлү нэһилиэгэр 2023 сыллааҕы булт лицензияларын үллэрии тэрээһинэ буолан ааста.
Кыттыыны ыллылар: улуeс баһылыгын тутуу боппуруостарыгар солбуйааччы Василий Филиппов, айылҕа харыстабылын судаарыстыбаннай хонтуруоллааһынын улуустааҕы инспекциятын салайааччыта Антонина Никитина, Төҥүлү нэһилиэгэ баһылыга Петр Эверстов уонна да атын тутаах исписэлиистэр, хамыыһыйа чилиэттэрэ.
Уопсайа сэрэбиэйгэ тыатааҕыга 3 лицензия, туйахтаахха 79 лицензия онньонно.
Тайахха -5
Кулааһайга - 6
Туртаска 59
Кыыл табаҕа 9
Айылҕа харыстабылын судаарыстыбаннай хонтуруоллааһынын улуустааҕы инспекциятын салайааччыта Антонина Никитина:
- Туйахтаахха уонна тыатааҕыга 2023-24 булт болдьоҕор улууска көрүллүбүт 35% көҥүлүн (лицензиятын) түҥэтиигэ хамыыһыйа тэрийэн тахсан сэрэбиэй ыыттыбыт. Баҕалаах олус элбэх, ол иһин сиэрдээх буоллун диэн аҕыйах сылтан бэттэх сэрэбиэй ыытар буоллубут. Бүгүн тиксибэтэхтэр хомойботтор, тоҕо диэтэххэ өссө 35% куоракка экология министиэристибэтин сэрэбиэйигэр түҥэтиллэр, 30% - оройуоҥҥа биотехническай тэрээһиннэргэ кыттыбыттарга үллэриллэр. Көҥүлгэ тиксибит булчуттары атырдьах ыйын 1 күнүгэр айылҕа харыстабылын судаарыстыбаннай хонтуруоллааһынын улуустааҕы инспекциятыгар сарсыарда 9 чаастан күүтэбит.
Саха үгэһинэн алгысчыт арыылаах алаадьынан, уохтаах кымыһынан айах тутан сиэр-туом толордо. Ытык-мааны далбар хотуттар алгыстаах алаадьынан мустубут бар дьону күндүлээтилэр. Сэрэбиэй саҕаланна. Бииртэн биир үөрбүт-көппүт, бааттара таайбыт, күлүм-мичик аллайбыт дьон сыанаҕа сүүрэн тахсан соһуччу лицензияҕа тиксэр эриэккэс күндү түгэни биллэ. Быыһыгар, ырыаһыттар тахсан ылбаҕай ырыаларын булчуттарга бэлэхтээтилэр.
Маны сэргэ, саха быһаҕын дьаарбаҥка-быыстапката тэрээһини киэркэттэ. Сахалыы ас-үөл, эмис сыалаах үтэһэлээх эт, быырпах, итии чэй атыыта-тутуута ураты сылаас эйгэни үөскэттэ.
Улуус салалтатын көҕүлээһининэн көһө сылдьар лаборатория кэлэн үлэлээн, мустубут бар дьон саахардарын, хаан баттааһыннарын бэрэбиэркэлээбитэ - тэрээһин биир эмиэ кэрэхсэбиллээх түгэнинэн буолла.
Булду олохторун арахсыспат аргыһа оҥостубут саха дьоно, бу күн бааттара тосхойон сүрдээҕин үөрэн-көтөн, сүргэлэрэ көтөҕүллэн дьиэлэригэр тарҕастылар.
Сотору көмүс күһүн.
Баай Байанайдара тосхойдун! Өттүк харалаах, илии тутуурдаах аар тайҕаттан эргилинниннэр!
Мэҥэ Хаҥалас улууһун дьаһалтатын пресс-сулууспата
Информационный сайт Нижний Бестях. Позиция редакции не всегда совпадает с точкой зрения авторов. При перепечатке текстов либо ином использовании текстовых материалов с настоящего сайта на иных ресурсах в сети Интернет гиперссылка на источник обязательна.
В титульной части сайта использованы фотографии Светланы Ивановой, лицензия CC-BY-SA-3.0