Бүгүн, атырдьах ыйын 21 күнүгэр,
улуус дьаһалтатын үлэтин тэрийэр уонна кадрдары салайар салаа салайааччыта Станислав Захаров,
Хаптаҕай нэһилиэгин баһылыга Иван Зыков
СӨ тыа хаһаайыстыбатын, үлэ, тыыл бэтэрээнэ Романов Николай Николаевич
90 сааһын туолбут ытык-бэлиэ күнүнэн итиитик-истиҥник эҕэрдэлээтилэр.
Ытык кырдьаҕаска Дойдубут тэбэр сүрэҕиттэн Кремльтэн,
СӨ Ил Дарханыттан Айсен Николаевтан,
улуус баһылыгыттан Дмитрий Тихоновтан, улуустааҕы социальнай харалта салалтатыттан эҕэрдэ суруктары, күндү өйдөбүнньүк бэлэхтэри туттардылар.
Николай Николаевич үйэлээх сааһын тухары үлэни өрө туппут, элбэх оҕо амарах аҕата, үгүс сиэн, хос сиэн эйэҕэс эһэтэ буолар.
Ленин аатынан сопхуос биир бастыҥ тарбахха баттанар бэтэринээрэ.
Үтүө суобастаах үлэтин иһин Социалистическай күрэхтэһии кыайыылааҕа бэлиэтинэн,
Сойуус, оройуон грамоталарынан, махтал суруктарынан наҕараадаламмыта.
Үтүө санаалаах аҕа сүбэһит быһыытынан элбэх ыччаты, исписэлииһи үөрэтэн, иитэн-такайан таһаарбыта.
1953 сыллаахха Сэбиэскэй Сойуус уонна Кытай доҕордоһуулара мэтээлинэн наҕараадаламмыта,
Мэҥэ Хаҥалас улууһун Бочуот кинигэтигэр суруллан киирбитэ.
90 саас дьоһун саас. Николай Николаевич дьоллоох киһи. Уһун олоҕу олорон, үлэни өрө тутан, кини олоҕун суола биһиэхэ барыбытыгар үтүө холобур буолар.
Мэҥэ Хаҥалас улууһун дьаһалтатын пресс-сулууспата
Информационный сайт Нижний Бестях. Позиция редакции не всегда совпадает с точкой зрения авторов. При перепечатке текстов либо ином использовании текстовых материалов с настоящего сайта на иных ресурсах в сети Интернет гиперссылка на источник обязательна.
В титульной части сайта использованы фотографии Светланы Ивановой, лицензия CC-BY-SA-3.0