Бүгүн, атырдьах ыйын 24 күнүгэр,
Майа сэлиэнньэтигэр оройуоннааҕы киин балыыһаҕа улуустааҕы мэдиссиинискэй үлэһиттэр сүбэ мунньахтара ыытылынна.
Мунньахха улуус баһылыгын бастакы солбуйааччы Василий Михайлов, улуус кылаабынай бырааһа Алексей Павлов, анал идэлээх быраастар уонна нэһилиэктэр фельдшерскай-акушерскай пууннарын эмчиттэрэ кыттыыны ыллылар.
Сүрүн болҕомто улууска онкологическай ыарыы билиҥҥи туругар ананна. Өрөспүүбүлүкэтээҕи онкологическай диспансер кылаабынай бырааһын солбуйааччы Светлана Мыреева кэнники уон сылга биһиги улууспутугар
онкология ыарыыта 10% үрдээбитин туһунан биллэрдэ.
Ыарыыны эрдэттэн сэрэтиигэ диспансеризацияны сыллата күүһүрдэргэ ыҥырда, рак ыарыы кыра кэрдииһигэр эмтэниигэ бэринимтиэтин тоһоҕолоон туран бэлиэтээтэ.
Дьон өйүгэр-санаатыгар киирбит "бу ыарыы эмтэммэт, бириигэбэр" диэн сыыһа өйдөбүлү тосту уларытар кэм кэлбитин ыйда.
Мунньах иккис түһүмэҕэ сэллик ыарыыны бопсууга ананна.
Улуустааҕы сэллик ыарыыны утарар диспансер сэбиэдиссэйэ Екатерина Борисова кэнники сүүрбэ сыл түмүгүнэн сэллик ыарыы таһыма улууска лаппа түспүтүн сырдатта.
Өскөтүн 2003 сыллаахха 37 киһи булуллубут эбит буоллаҕына, улууска быйыл 6 киһи учуокка тураллар, эмтэниини ааһаллар. Бу үчүгэй көрдөрүү.
Ол эрээри улуус үрдүнэн ФЛГ хонтуруол, диспансеризация үлэтэ тэрилтэлэринэн толору кыаҕынан ыытыллыбатын эмчит бэлиэтээтэ. Тэрилтэлэр салалталара үлэһит дьонун доруобуйаларын туһугар эппиэтинэстээх буолалларыгар ыҥырда.
Этиллибит санаалары сурукка тиһэн, быһаарыы ылынан олоххо киллэрэргэ медиктар бары биир киһи курдук куоластаатылар.
Улуустааҕы киин балыыһа кылаабынай бырааһа Алексей Павлов
быйыл кэккэ нэһилиэктэргэ бэйэлэрин баҕа санааларынан кэлбит эдэр эмчиттэри кэлэктиип иннигэр билиһиннэрдэ,
дьон доруобуйатыгар кыһаллар, сыралаах, чэпчэкитэ суох үлэлэригэр ситиһиилэри баҕарда.
Мэҥэ Хаҥалас улууһун дьаһалтатын пресс-сулууспата
Информационный сайт Нижний Бестях. Позиция редакции не всегда совпадает с точкой зрения авторов. При перепечатке текстов либо ином использовании текстовых материалов с настоящего сайта на иных ресурсах в сети Интернет гиперссылка на источник обязательна.
В титульной части сайта использованы фотографии Светланы Ивановой, лицензия CC-BY-SA-3.0