Эдэр олоҥхоһуттарга аналлаах, 2-с төгүлүн ыытыллыбыт "Саха" көрдөрөр-иһитиннэрэр хампаанньа бырайыага - "Олоҥхо-баттл" өрөспүүбүлүкэтээҕи күрэс кыайыылааҕынан биир дойдулаахпыт - улуустааҕы култуураҕа уонна духуобунай сайдыыга салалта методиһа, олоҥхоһут, Саха Өрөспүүбүлүкэтин Дархан этээччитэ Станислав Иванов муҥутуур кыайыылааҕынан таҕыста.
Күрэх өрөспүүбүлүкэбит араас муннугуттан уон кыттааччыны түмтэ. Көрөөччүлэр күөх экран нөҥүө ый кэриҥэ олоҥхоһуттарбытын долгуйа, сэргии көрдүбүт-иһиттибит.
Станислав Александрович, айылҕаттан бэриллибит дьоҕургунан бэриниилээхтик, умсугутуулаахтык үлэлээн, өрөспүүбүлүкэбит олохтоохторун үрдүк сыанабылларын, биһирэбиллэрин ылбыт улахан кыайыыгынан итиитик-истиҥник эҕэрдэлиибит!
Сахабыт уус-уран тыла, оһуокайа, олоҥхото, култуурата сайдарын туһугар айымньылаахтык таһаарыылаахтык үлэлии-хамсыы сылдьаргынан киэн туттабыт. Инникитин даҕаны үүнэ-сайда тур, бу ситиһииҥ өссө үрдүккэ кынаттаатын!
Мэҥэ Хаҥалас улууһун дьаһалтатын пресс-сулууспата
Информационный сайт Нижний Бестях. Позиция редакции не всегда совпадает с точкой зрения авторов. При перепечатке текстов либо ином использовании текстовых материалов с настоящего сайта на иных ресурсах в сети Интернет гиперссылка на источник обязательна.
В титульной части сайта использованы фотографии Светланы Ивановой, лицензия CC-BY-SA-3.0