Бу күһүн, балаҕан ыйыгар, Мэҥэ Хаҥалас улууһун баһылыга Дмитрий Тихонов чөл олоҕу көҕүлүүр сыаллаах «Чөл олох чорооно» улуустааҕы Грант куонкуруһун биллэрбитэ. Манна Майа сэлиэнньэтин дьаһалтатын Дьиэ кэргэн киинин салайааччыта Владлена Павлова «Дьол уйата - дьиэ кэргэн» бырайыагынан кыттан кыайыылаах тахсыбыта.
Бүгүҥҥүттэн, сэтинньи 17 күнүттэн, «Дьол уйата - дьиэ кэргэн» бырайыак олоххо киирэн саҕалаата.
Бырайыак ис хоһооно – дьиэ кэргэн сыһыанын бөҕөргөтүүгэ, төрөппүт оҕотунуун алтыһар бириэмэтин туһалаахтык, интэриэһинэйдик атаарарын тэрийиигэ, уопсастыбаннай олоххо көхтөөх буолалларыгар ананар.
«Дьол уйата - дьиэ кэргэн» бырайыак түһүмэхтэрэ:
1) «Ийэ оҕотунуун»;
2) «Аҕа оҕотунуун»;
3) Уйулҕа үөрэхтээхтэрин кытта уонна харчыны таба туһаныы ньымаларын билсии;
4) Дьарыктаах буолуу киинин сүбэлэрэ, үлэ буларга көмөлөһүү.
Бырайыак бастакы хардыыта “Туойаана” мастарыскыайга чөл олох чороонун оҥорор маастар-кылаастан саҕаланна. “Туойаана” мастарыскыай хаһаайыттара Валентина Владимировна уонна Петр Петрович Егоровтар дьиэ кэргэн бүгүҥҥү бырайыак кыттыылаахтарыгар хайдах туой буортан чороону оҥорорго көрдөрдүлэр, үөрэттилэр.
Бырайыак кыттыылаахтара өбүгэбит үгэһин утумнаан, харысхал буолар сахалыы оһуордарбытын уруһуйдаан, ийэлэр оҕолорунуун бииргэ уопсай дьыалаҕа ситимнэрин холбоон, сыһыаннарын өссө бөҕөргөтөн бары олуһун сөбүлээн, сэргээн, бириэмэлэрин айымньылаахтык атааран астыннылар-дуоһуйдулар.
Салгыы бырайыак «Ийэ оҕотунуун» түһүмэҕэр сибэкки олордуута уонна аһаҕас кэпсэтии ыытыллара былааннанар.
Администрация сельского поселения «Село Майя»