Рекламный баннер 728x90px main1
ӨЛӨЧӨЙГӨ ФАП САҤА МОДУЛЬНАЙ ДЬИЭТЭ ҮЛЭҔЭ КИИРДЭ
Бүгүн Алтан нэһилиэгэр үөрүүлээх күн үүннэ - фельдшерскэй-акушерскай пуун саҥа модульнай дьиэтэ арылынна.
Аныгылыы, тупсаҕай оҥоһуулаах, бары ирдэбиллэргэ эппиэттиир, благоустроеннай эбийиэги «Доруобуйа харыстабыла» национальнай бырайыак көмөтүнэн, «Сахауниверсал» хааччахтаммыт эппиэтинэстээх тэрилтэ тутан олоххо киллэрдэ.
Улуус баһылыгын бастакы солбуйааччы Василий Михайлов, улуустааҕы киин балыыһа кылаабынай бырааһа Алексей Павлов, Алтан нэһилиэгин баһылыга Николай Матчитов олохтоохтору, мустубут ыалдьыттары, доруобуйа харыстабылын үлэһиттэрин, бэтэрээннэри бу үөрүүлээх бэлиэ күнүнэн истиҥ тылларынан эҕэрдэлээтилэр.
ФАП саҥа эбийиэгэр Табаҕаттан төрүттээх, Дьокуускайдааҕы медицинскэй колледжы бүтэрэн кэлбит Диана Романова фельшеринэн,
Бүлүүгэ үлэлии сылдьыбыт Джулия Васильева акушерынан ананан кэллилэр.
Эдэр үлэһиттэри олорор дьиэнэн хааччыйбыттар.
Алтан нэһилиэгэр медпуун 1952 сыллаахха тэриллибит, бастакы фельшеринэн Матрена Афанасьевна Сидорова үлэлээбит.
Бу күн Өлөчөй медпуунугар араас сылларга үлэлээн ааспыт, үтүө кылааттарын киллэрбит фельшердар, мантан кынаттанан тахсыбыт быраастар мустаннар үлэлээбит сылларын ахтан-санаан тураннар саҥа кэлбит эдэр, кэскиллээх исписэлиистэргэ таһаарыылаах үлэни баҕардылар.
Мэҥэ Хаҥалас улууһун дьаһалтатын пресс-сулууспата
500
Рекламный баннер 728x90px main2