Рекламный баннер 728x90px main1
“Хомус алыптаах эйгэтэ”
Сэтинньи 30 күнэ - Сахабыт сиригэр Хомус национальнай күнэ.
Хомус күнүн көрсө бүгүн сэтинньи 28 күнүгэр Гавриил Колесов аатынан Олоҥхо Дьиэтин түһүлгэтигэр “Хомус алыптаах эйгэтэ” дьоро тэрээһин ыытылынна.
Үтүө үгэһинэн, саха сиэринэн тэрээһин алгыс, арчы сиэринэн-туомунан саҕаланна, алгыһы Ороссолуода нэһилиэгиттэн алгысчыт, хомус ууһа Роман Иванов түһэрбитэ кэрэхсэбиллээх.
Сахабыт сиригэр Олоҥхо, Хомус күннэринэн Гавриил Колесов аатынан Олоҥхо Дьиэтин салайааччыта Евдокия Николаевна Иванова эҕэрдэлээтэ.
Дьүрүһүтэр хомус алыптаах тыаһынан “Сайар Саха”, “Айыллыы” фольклорнай бөлөх, “Ымыычаан”, “Эрэлчээн” хомусчуттар бөлөхтөрө, Эльмира Акимова, Анита Павлова, салайааччы Аксинья Степанова, “Чугдаар” Майатааҕы В.П. Ларионов аатынан орто оскуола, салайааччылар Ульяна Ефремова, Валентина Кривошапкина, Ороссолуода нэһилиэгиттэн “Алгыс” фольклорнай бөлөх, салайааччы Роман Иванов, Дьаҥхаады нэһилиэгиттэн “Тэтим” фольклорнай бөлөх, салайааччы Анна Максимова эҕэрдэлээтилэр.
Хомус күнүн биир ураты түгэнинэн бары тэрээһин кыттыылаахтара, хомуһу сэргээччилэр, сэҥээрээччилэр биир киһи кэриэтэ, биир тэтимҥэ киирэн дьүрүскэн хомустарынан дьүһүйэ оонньоотулар, ол кэннэ күн үҥкүүтэ оһуохайынан түмүктээтилэр.
Хомус күнүн тэрээһинигэр Аллараа Бэстээхтэн, Майаттан, Дьаҥхаады, Тараҕай, Догдоҥо, Ороссолуода нэһилиэктэриттэн үөрэнээччилэр, улахан дьон, барыта 128 хомуһу сэҥээрээччи кыттыыны ылан, хомус тыыныгар киирэн үөрэ-сэргэхсийэн тарҕастылар.
Айта Васильева Гавриил Колесов аатынан
“Олоҥхо Дьиэтин” уус-уран салайааччыта
426
Рекламный баннер 728x90px main2