Рекламный баннер 728x90px main1
УЛУУСТААҔЫ КИИННЭММИТ БУХГАЛТЕРИЯ АРЫЛЛЫЫТЫН БЭЛИЭТЭЭТЭ
Бүгүн, ахсынньы 15 күнүгэр, улууспут Кииннэммит бухгалтериятын арыллыыта үөрүүлээх быһыыга-майгыга бэлиэтэннэ.
Нюргуяна Прокопьевна Дмитриева салайааччылаах улуустааҕы Кииннэммит бухгалтерия бэс ыйын 19 күнүгэр тэриллэн, атырдьах ыйын 1 күнүттэн үлэтин саҕалаабыта.
Быйыл 30 нэһилиэк, култууралар кииннэрэ, 23 улуус тэрилтэлэрин бухгалтердара кииннэммит учуот ирдэбилинэн холбоһон үлэлии олороллор.
Эһиилги сылга үөрэҕирии тэрилтэлэрэ кыттыһаннар уопсайа 122 үлэһиттээх бухгалтерия үп-харчы сааһыланыытыгар ыытар үлэтин тиһигин быспакка салҕыаҕа.
Саҥа тэриллибит тэрилтэбитигэр улууспут Ытык сүбэтин салайааччыта, алгысчыт Зиновий Игнатьев алгыс тылын түһэрдэ.
Улуус баһылыга Дмитрий Тихонов, баһылыгы социальнай уонна имиджевэй бэлиитикэҕэ солбуйааччы Альбина Григорьева, финансовай салалта салайааччыта Станислав Стручков таһаарыылаах үлэни баҕаран туран эҕэрдэ тылларын эттилэр.
Бу күн Хаҥалас уонна Амма улуустарын Кииннэммит бухгалтерияларын салайааччылара Нюргустана Чибыева уонна Роман Алексеев кэлэн үөрүүлээх бэлиэ түгэнинэн кэллиэгэлэрин эҕэрдэлээтилэр.
Үп хамсааһынын саҥа таһымҥа таһааран Кииннэммит бухгалтериябыт ньир-бааччы тэринэн киэн далааһыннаах үлэни ыытыа диэн эрэнэбит.
Мэҥэ Хаҥалас улууһун дьаһалтатын пресс-сулууспата
536
Рекламный баннер 728x90px main2