Рекламный баннер 728x90px main1
ФЕДОР МАРКОВ БЫЫСТАПКАТА АРЫЛЫННА
Ахсынньы 14 күнүгэр Дьокуускай куорат Национальнай художественнай түмэлигэр биир дойдулаахпыт Федор Марков үбүлүөйдээх 75 сааһын бэлиэтээн «Сэлии сэһэнэ» быыстапкатын арыйда.
Федор Иванович Тараҕай нэһилиэгиттэн төрүттээх, Арассыыйа худуоһунньуктарын сойууһун чилиэнэ, Саха Өрөспүүбүлүкэтин норуодунай худуоһунньуга, норуот маастара, муосчут, скульптор, биһиги улуус биир киэн туттар, ытыктыыр талба талааннаах ууһа буолар.
Быыстапка үөрүүлээх арыллыытынан улуус баһылыга Дмитрий Тихонов, СӨ Ил Түмэн судаарыстыбаннай мунньаҕын маассабай иһитиннэрии ньымаларын уонна култуура кэмитиэтин бэрэссэдээтэлэ Виктор Губарев, СӨ Култуураҕа уонна духуобунай сайдыы миниистирэ Афанасий Ноев,
улуус баһылыгын социальнай уонна имиджевэй бэлиитикэҕэ солбуйааччы Альбина Григорьева, Тараҕай нэһилиэгин баһылыга Юрий Порядин, Г.Г.Колесов аатынан Олоҥхо дьиэтин дириэктэрэ Евдокия Иванова эҕэрдэлээтилэр.
Быыстапка ахсынньы 15 күнүттэн 2024 сыл олунньу 18 күнүгэр диэри Национальнай художественнай түмэл 3 этээһигэр выставочнай саалаҕа дьон-сэргэ көрүүтүгэр туруоҕа.
Манна маастар муостан уһааран-чочуйан, айан таһаарбыт дириҥ ис хоһоонноох уран оҥоһуктара турдулар.
Аадырыс: Дьокуускай куорат Кирова уулуссатын 9 дьиэтэ, 3 этээс, выставочнай саалата.
Сиһилии билсэр нүөмэргит: 8 4112 33-52-79
Мэҥэ Хаҥалас улууһун дьаһалтатын пресс-сулууспата
464
Рекламный баннер 728x90px main2