МАЙАҔА БАСТЫҤНАР ААТТАННЫЛАР
Ахсынньы 21 күнүгэр Майа сэлиэнньэтигэр сыл түмүгүнэн бастыҥ көрдөрүүнү ситиспит, үтүө холобур буолар дьону БАСТЫҤ бириэмийэнэн наҕараадалааһын түһүлгэтэ тэрилиннэ.
Тэрээһини Сардаана, Александр Лукиннар иилээн-саҕалаан ыыттылар, Далаана, Санита Ай, Эрхаан, Евгения Шамаева курдук саха эстрадатын чаҕылхай сулустара киэргэттилэр.
Майа тупсарыгар-сайдарыгар үлэлии-хамсыы, айа-тута сылдьар, сарсыҥҥыны салайсар дьоҥҥо, түмсүүлэргэ олохтоммут Бастыҥ бириэмийэ хаһаайыннарынан буоллулар:
Бастыҥ уопсастыбаннай түмсүү - Түмэн иис сыаҕа, салайааччы Федора Наумова, бириэмийэни туттарда СӨ Ил Түмэн дьокутаата, Саха НКИХ генеральнай дириэктэрэ Олег Марков.
Бастыҥ уопсастыбанньык - Евдокия Семенова, бириэмийэни туттарда СӨ үтүөлээх суруналыыһа, Саха НКИХ үрүҥ көмүс бэлиэтин хаһаайына, Саха сирэ хаһыат суруналыыһа Елена Потоцкая.
Бастыҥ түөлбэ - Александра Кузьмина салайааччылаах Сайдыы түөлбэ, бириэмийэни туттарда улуус баһылыгын социальнай уонна имиджевэй бэлиитикэҕэ солбуйааччы Альбина Григорьева.
Бастыҥ айар кут - Александра Скрябина, бириэмийэни туттарда улуустааҕы култуура уонна духуобунай сайдыы салалтатын начаалынньыга Анна Исакова.
Сыл бастыҥ ыала - Клавдия, Василий Тихоновтар, бириэмийэни туттарда улуустааҕы социальнай бэлиитикэ салалтатын начаалынньыга Октябрина Кулешова.
Бастыҥ көхтөөх тэрилтэ - Екатерина Романова салайааччылаах Кэнчээри оҕону сайыннарар киин, бириэмийэни туттарда Сахатранснефтегаз Мэҥэ хаҥаластааҕы филиалын салайааччыта Анастасия Федорова.
Бастыҥ урбаанньыт - Павел Саввин, бириэмийэни туттарда СӨ Ил Түмэн дьокутаата, Хаҥалас агрохолдинг ТХПК бэрэссэдээтэлэ Тихон Скрябин.
Бастыҥ амарах санаа - Марелла Баишева, бириэмийэни анал байыаннай дьайыыга сылдьар уолаттарга күүс-көмө буолар волонтербут, Амарах сүрэх СӨ бочуоттаах бэлиэтин хаһаайката Алена Лебедкина.
Бастыҥ кэтэх хаһаайыстыба - Ангелина Скрябина, бириэмийэни туттарда СӨ Ил Түмэн дьокутаата, сир сыһыаннаһыыларыгар, айылҕа баайыгар уонна экологияҕа сис кэмитиэтин бэрэссэдээтэлэ Андрей Находкин.
Оҕолорго сыл бастыҥ спортсмена - В.П. Ларионов аатынан Майа орто оскуолатын 11 кылааһын үөрэнээччитэ Эрсан Сыроватский, бириэмийэни туттарда СӨ Ил Түмэн дьокутаата, А.Д. Макарова аатынан Дьокуускайдааҕы култуура уонна искусство колледжын дириэктэрэ Захар Никитин.
Улахан дьоҥҥо сыл бастыҥ спортсмена - Эдуард Афанасьев, бириэмийэни улуус дьокутаата Иван Пивоваров туттарда.
Бэтэрээннэргэ сыл бастыҥ спортсмена - Петр Барашков, бириэмийэни туттарда СӨ физическэй култуураҕа уонна спортка үтүөлээх үлэһитэ, Тараҕай, Хара, Наахара нэһилиэктэрин бочуоттаах олохтооҕо Александр Попов.
Адаптивнай спортка бастыҥ спортсмен - Любовь Саввина, бириэмийэни улуустааҕы инбэлииттэр уопсастыбаларын бэрэссэдээтэлэ Тамара Пермякова туттарда.
Сыл бастыҥ тренера - Ариан Монастырев, бириэмийэни туттарда СӨ физическэй култууратын үтүөлээх үлэһитэ, Мэҥэ Хаҥалас улууһун бочуоттаах олохтооҕо, Аҕа дойдуга үтүөлэрин иһин 2-с истиэпэннээх уордьан хаһаайына Афанасий Илларионов.
Бастыҥ үлэ киһитэ - Артем Бикетов, бириэмийэни улуустааҕы дьарыктаах буолуу киинин салайааччыта Федор Белолюбскай туттарда.
Бастыҥ волонтер - Евдокия Сидорова, бириэмийэни туттарда улуустааҕы култуура уонна духуобунай сайдыы салалтатын начаалынньыгын солбуйааччы Александр Кулешов.
Бириэмийэ кыайыылаахтарыгар күндү таас бриллианнаах, көмүс суруктаах анал бэлиэни уонна Сахамедиа хампаанньаттан Саха сирэ хаһыакка сыллааҕы суруттарыыны бэлэх ууннулар.
Улуус баһылыга Дмитрий Тихонов бары үтүө үлэһит дьону, Бастыҥ бириэмийэ номинаннарын, кыайыылаахтарын эҕэрдэлээн туран Уһуйааччы уонна Аҕа сүбэһит сылын түмүктээн үүнэр көлүөни, оҕонуиитиигэ сүҥкэн кылаатын, нэһилиэк сайдыытыгар боччумнаах кылаатын, өр сылларга үтүө суобастаах үлэтин иһин В.П. Ларионов аатынан майа орто оскуолатын учууталыгар Ильина Еленаҕа уонна Ф.Г. Охлопков аатынан Майа орто оскуолатын учууталыгар Надежда Игнатьеваҕа Мэҥэ Хаҥалас улууһа муниципальнай оройуон дьаһалтатын Оройуоҥҥа өҥөтүн иһин бэлиэлээх грамоталары туттарда.
Ону тэҥэ, Саха Өрөспүүбүлүкэтигэр эдэр ыаллары дьиэнэн-уотунан хааччыйыы судаарыстыбаннай бырагыраама кыттыылаахтарыгар Людмила, Сергей Бурцевтарга дьиэ кэргэҥҥэ социальнай төлөбүр анаммытын туһунан туоһу суругу уунна.
Майаҕа Аҕа сылын түмүктээн баһылык Алексей Неустроев үтүө түмүктэрдээх үлэни ыыппыттарыгар махтанан туран Аҕа сүбэтин кыттыылаахтарыгар, сэлиэнньэ көхтөөх аҕаларыгар өрөспүүбүлүкэтээҕи Аҕалар лигаларын Үтүө суобастаах үлэтин иһин өйдөбүнньүк мэтээлинэн наҕараадалаата.
Чөл олоҕу, спорду көҕүлүүр Бэйэни өрө тардыныы бырайыак көхтөөх кыттыылаахтарыгар Саха сиригэр физкультурнай хамсааһын 100 сылыгар аналлаах өйдөбүнньүк бэлиэни бастыҥ дьиэ кэргэннэргэ Любовь, Станислав Баишевтарга, Стелла, Айаал Яковлевтарга туттарда.
Сэлиэнньэ сайдыытыгар тус кылааттарын киллэрбит, нэһилиэк ыытар тэрээһиннэригэр көхтөөх кыттыыны ылбыт аҕаларга Майа дойдум барахсан бочуоттаах бэлиэнэн наҕараадалаата.
Улууспут духуобунай киинэ үгүс элбэх үтүө үлэһит дьоннорунан биллэр, сыллата тэтимнээхтик сайдар, үгэскэ кубулуйар үтүө тэрээһиннэри төрүттүүр.
Майа сэлиэнньэтин бастыҥ үлэһит дьонун көҕүлүүр, инникигэ сирдиир тэрээһин үрдүк таһымҥа тэриллэн ыытыллыбытын мустубут бар дьон бэлиэтээн, астынан-дуоһуйан туран баһылыкка Алексей Неустроевка дириҥ махталларын тиэртилэр.
Мэҥэ Хаҥалас улууһун дьаһалтатын пресс-сулууспата
