Улуустааҕы социальнай бэлиитикэ салалтата ахсынньы 26 күнүгэр Д.Ф. Ходулов аатынан Култуура киинигэр сылы түмүктүүр, бастыҥнары чиэстиир тэрээһинэ ыытылынна.
Тэрээһини саҕалыах иннинэ Ийэ дойдуларын туһугар байыаннай хапсыһыы толоонугар олохторун толук уурбут ыччаттарбытын чуумпуран туран кэриэстээтибит.
Анал эпэрээссийэ кэмигэр хорсун быһыыны оҥорон геройдуу охтубут биир дойдулаахтарбытыгар - Ходоро нэһилиэгин олохтооҕор Бурнашев Арчын Антоновичка, Хорообут нэһилиэгин олохтооҕор Колесов Денис Константиновичка «Эр санаа» уордьан иҥэрилиннэ. Улууспут баһылыга Дмитрий Тихонов бэлиэлэри Арчын Антонович төрөппүттэригэр Татьяна Романовна уонна Антон Антонович Бурнашевтарга, Денис Константинович ийэтигэр Варвара Николаевна Колесоваҕа туттарда.
Уолаттарбытынан киэн туттабыт, сүгүрүйэбит!
Салгыы холобур буолар дьиэ кэргэттэрбитин, көхтөөх уопсастыбанньыктарбытын, ситиһиилээх ыччаттарбытын
Саха Өрөспүүбүлүкэтин Ил Түмэн Судаарыстыбаннай мунньаҕын бэрэссэдээтэлэ Алексей Еремеев, улууспут баһылыга Дмитрий Тихонов, СӨ ыччат дьыалатыгар уонна социальнай коммуникацияҕа миниистири солбуйааччы Андрей Сосновскай, Ил Түмэн дьокутаата, сир сыһыаннаһыыларыгар, айылҕа баайыгар уонна экологияҕа сис кэмитиэтин бэрэссэдээтэлэ Андрей Находкин, Ил түмэн дьокутаата, А.Д. Макарова аатынан Дьокуускайдааҕы култуура уонна искусствотын колледжын дириэктэрэ Захар Никитин, Ил Түмэн дьокутаата, "Хаҥалас-Агрохолдинг" тыа хаһаайыстыбатын потребительскай кээпэрэтиибин бэрэссэдээтэлэ Тихон Скрябин, Ил Түмэн дьокутаата, "Саха" НКИХ генеральнай дириэктэрэ Олег Марков, улуустааҕы социальнай бэлиитикэ салалтатын салайааччыта Октябрина Кулешова эҕэрдэлээн туран наҕараадалары, анал ааттары туттардылар.
Улууспутугар ыччат уонна
дьиэ кэргэн бэлиитикэтигэр кылааттарын киллэрэр, күүс-көмө, тирэх буолар дьоммутун, уопсастыбанньыктарбытын, исписэлиистэри, түмсүүлэр кыттыылаахтарын ситиһиигитинэн уонна саргылаах Саҥа дьыл салаллан кэлбитинэн итиитик-истиҥник эҕэрдэлиибит. Үүнэр сылга айымньылаах, таһаарыылаах үлэни, үрдүк ситиһиилэри баҕарабыт. Чэгиэн, этэҥҥэ сылдьыҥ, дьоллоох-соргулаах буолуҥ!
Хаартыскалары бу сигэнэн киирэн көрүөххэ сөп
https://drive.google.com/drive/folders/1G_gKIxcICbih0..Мэҥэ Хаҥалас улууһун дьаһалтатын пресс-сулууспата