⠀⠀Оттооһун
⠀
⠀⠀Республика Бырабыыталастыбатын Бэрэссэдээтэлин солбуйааччы Михаил Никифоров, Саха Республикатын тыа хаһаайыстыбатын миниистирин солбуйааччы Николай Афанасьев Мэҥэ Хаҥалас улууһугар оттооһун хайысхатыгар үлэлээтилэр. Делегацияны улуус баһылыгын бастакы солбуйааччыта Семен Потапов салайан илдьэ сырытта.
⠀
⠀⠀Республика салалтата бастатан туран, Мэҥэ, Доллу, Төҥүлү, Араҥас нэһилиэктэрин эҥэр оттуур ходуһалары, сири-уоту миэстэтигэр тиийэн көрдүлэр, от үүнүүтэ хайдаҕын билистилэр.
⠀
⠀⠀Күн иккис аҥарыгар Аллараа Бэстээххэ култуура дьиэтигэр нэһилиэктэр баһылыктарын, тыа хаһаайыстыбатын үлэһиттэрин, бааһынай, кэтэх хаһаайыстыбалаахтары кытта көрсүһүү тэрийдилэр. Манна от үлэтигэр билиҥҥи туругунан туох моһуоктар көстөллөрүн, ханнык ыарахаттар баалларын иһиттилэр.
⠀
⠀⠀Михаил Никифоров Республика үрдүнэн оттооһуҥҥа балаһыанньа уустугун дьоҥҥо-сэргэҕэ иһитиннэрдэ. Онон, инникитин от атыылаһар туһунан күүскэ эрэммэккэ, бары кыаҕы бэйэ күүһүгэр ууран туран оттуохха наадатын бэлиэтээн эттэ.
⠀
⠀⠀Онуоха улуус дьаһалтата үп-харчы өттүнэн, илиинэн оттооһуҥҥа мото коса да ылыытыгар, оттуур ходуһалары дулҕалартан ыраастааһыҥҥа, мобильнай биригээдэлэри тэрийээһиҥҥэ үбү-харчыны аттаран сөптөөҕүн тыырар, күүс-көмө буолар.
⠀
⠀⠀Мунньахха биирдиилээн дьон, баһылыктар бэйэлэрин боппуруостарын биэрдилэр, Правительство көмөтүн сыаналаатылар, махталларын биллэрдилэр.
Сорохтор сыл тахсар оту, улуус сирин-уотун иһиттэн, атын улуус ходуһаларын сыыстаабакка оту ылар кыахтаахтарын эмиэ биллэрдилэр.
⠀
⠀⠀Улуус дьаһалтата Бырабыыталастыбаҕа сүрүн туруорсар боппуруостарын иһитиннэрдэ. Ол курдук, бастатан туран, хаһаайыстыбалар мобильнай биригээдэлэри тэрийэн барыыларыгар 6 мөл. солк. үбүлээһини көрүү. Иккиһинэн, аһыҥа эмин ылыыга көрүллэр субсидия кээмэйин улаатыннарыы. Үсүһүнэн, ынах сүөһү эбии аһылыгын оҥорон таһаарыы программатыгар көрүллэр Судаарыстыба үбүлээһинин 70%-ҥҥа дылы улаатыннарыы уонна 10 мөл. солк. хааччахтааһыны суох оҥоруу. Төрдүһүнэн, 1 тыһ. тонна уотурбаны (комбикорма) оҥорууга 13 мөл. солк. субсидияны көрүү. Бэсиһинэн, кыра үрэхтэргэ ууну хаайан, ходуһаны нүөлсүтэр быһыттары бырайыактаан тутууну Республика инвестиционнай программатыгар киллэрии.
⠀
⠀⠀Республика салалтата кэтэх хаһаайыстыбалаахтар ынахтарын-сүөһүлэрин эһэн кэбиспэттэрин туһугар араас көмөлөрү, үп-харчы өттүнэн субсидиялары оҥорорун дьон өйдүөх тустаах, диэн быһааран этэр Михаил Никифоров.
⠀
⠀⠀Дьон-сэргэ туруорсуутунан тыа хаһаайыстыбатын сокуонугар уларыйыылар киирэ тураллар. Мунньахха этиллибит санаалар, туруорсуулар, норуот эппит этиитэ салгыҥҥа ыйанан хаалбакка, барыта боротокуолланан, тиһиллэн олоххо киирэллэр.
0:54