Саха биир чулуу спортсменын, боксерун, киэн туттар ыччаппытын Василий Егоровы чиэстиир тэрээһин бүгүн, алтынньы 18 күнүгэр, Т.А. Пинегин аатынан "Парус" спорт комплексыгар буолла.
Чита куоракка балаҕан ыйын 29 алтынньы 9 күннэригэр ыытыллыбыт боксаҕа Арассыыйа чемпионатыгар кыайыы көтөллөнөн, улуу дойдубут биир бастыҥ спортсмена буоларын бэһис төгүлүн көрдөрдө.
Улууспут баһылыга Дмитрий Тихонов Василий Егоровы кэнчээри ыччакка ыарахаттартан чаҕыйбат дьулуур, инникигэ уҕараабат дьүккүөр үтүө холобурун быһыытынан сыаналаан туран, киниттэн өссө элбэҕи кэтэһэбит, эрэнэбит диэтэ уонна улуус салалтатын аатыттан 100 тыһыынча солкуобайдаах сертификаты, тренеригэр, убайыгар махтанан туран Николай Михайловичка 50 тыһыынчалаах сертификаты туттарда.
Василий Егоровы улахан ситиһиитинэн Хара нэһилиэгин баһылыга Дария Назарова, улуустааҕы үөрэх управлениетын начаалынньыга Николай Никифоров, СӨ физическэй култуураҕа уонна спортка үтүөлээх үлэһитэ, РФ физическэй култуураҕа уонна спортка туйгуна, Аҕа дойду иннигэр үтүөлэрин иһин II истиэпэннээх уордьан кавалера, Хара нэһилиэгин уонна Мэҥэ Хаҥалас улууһун Бочуоттаах олохтооҕо, улуус спордун бэтэрээннэрин сэбиэтин бэрэссэдээтэлэ Афанасий Илларионов, Парус спорт комплексын дириэктэрэ Дьулустаан Захаров, нэһилиэктэр баһылыктарын ааттарыттан Мэҥэ нэһилиэгин баһылыга Александр Куприянов эҕэрдэлээтилэр, наҕараадаларын туттардылар.
Үөрүүлээх тэрээһиҥҥэ Василий Михайлович ийэтэ Людмила Иннокентьевна, аҕата Михаил Николаевич, дьиэ кэргэнэ, чугас дьоно кытыннылар.
Мэҥэ Хаҥаластар тумус туттар уолбутугар, бастыҥ спортсмеммытыгар Василий Егоровка дойду, Европа, аан дойду таһымнарыгар инникитин даҕаны үрдүк ситиһиилээхтик кыттарыгар, чэгиэн туругу, бөҕө санааны баҕарабыт!
Информационный сайт Нижний Бестях. Позиция редакции не всегда совпадает с точкой зрения авторов. При перепечатке текстов либо ином использовании текстовых материалов с настоящего сайта на иных ресурсах в сети Интернет гиперссылка на источник обязательна.
В титульной части сайта использованы фотографии Светланы Ивановой, лицензия CC-BY-SA-3.0