“Мэнэ Уус” түмсүү айар талааннаахтара “Якутия мастеровая” түһүлгэтигэр
Сахабыт сирин бары айар талааннаахтарын, норуот маастардарын түмэр Дойдубутугар Дьиэ кэргэн, Сахабыт сиригэр Оҕо саас сылыгар аналлаах үгэс буолбут XIV Якутия мастеровая республикатааҕы быыстапка-дьаарбаҥка быйыл кулун тутар 4,5,6 күннэригэр А.Е. Кулаковскай аатынан норуоттар доҕордоһууларын дьиэтигэр киэҥ далааһыннаахтык ыытылынна.
Гавриил Колесов аатынан оройуоннааҕы норуот айымньытын киинэ Олоҥхо дьиэтин иһинэн тэриллибит Мэҥэ уус норуот айар талааннаахтарын түмсүүтүн маастарадара үс күн тухары күрэхтэргэ, сэлэлии хаамыыга уонна быыстапка-дьаарбаҥкаҕа бастыҥ үлэлэринэн көхтөөхтүк кытыннылар.
Кулун тутар 4 күнүгэр Якутия мастеровая быыстапка-дьаарбаҥка үөрүүлээх аһыллыытыгар Саха Республикатын культураҕа уонна духуобунай сайдыыга министрэ Афанасий Иванович Ноев, Симэх норуот уус уран оҥоһуктарын национальнай киинин салайааччыта Яна Викторовна Игнатьева норуот маастардарын эҕэрдэлээтилэр, бу дьоро түһүлгэни Майа сэлиэнньэтин Уран Майа түмсүү, сал: Сергеева Надежда Викторовна, Хаптаҕайтан Күөгэйэ түмсүү, сал: Терентьева Алекандра Юрьевна уран тарбахтаах Далбар Хотуттара сайыҥҥы, кыһыҥҥы мааны соннорун кэтэн долгулдьуйа хааман киэргэттилэр.
Сахабыт сиригэр Норуот маастарын күнүн бэлиэтиир кулун тутар 5 күнүгэр Дьокуускай куорат киин уулуссатынан сэлэлии хаамыыга Мэҥэ Хаҥалас улууһуттан, чуолаан Аллараа Бэстээхтэн, Майаттан, Хаптаҕай, Төҥүлү, 2-с Наахара, Дьанхаады, Мэлдьэхси нэһилэктэриттэн барыта 60-ча айар талааннаахтарбыт, уран уустарбыт мааны мандар сахалыы соннорун кэтэн, киэргэллэрин-симэхтэрин иилинэн дьоһуннук хаамтылар.
Якутия мастеровая норуот маастардарын дьоро түһүлгэтигэр СР уус-уран оҥоһуктарын маастара үрдүк аатын Хаптаҕай нэһилиэгиттэн туоһунан, сыахайынан (кукольник), саха төрүт ииһинэн дьарыктанар Терентьева Александра Юрьевна, Дьанхаады нэһилиэгиттэн төрүттээх сыахайдьыт (кукольник) Ноговицына Дария Михайловна, СР норуотун маастара албан ааты Майаттан импровизатор кырыымпаһыт, саха төрүт музыкальнай инструменнарын оҥорор, үйэтитэр, тарҕатар уран уус Габышев Руслан Прокопьевич, Төҥүлүттэн тимир, мас ууһа Баишев Елисей Андреевич Дэлэй Уус ыллылар.
Сыл ахсын Якутия мастеровая тэрээһиннэрэ, күрэхтэрэ элбээн, кэҥээн иһэр, ол курдук Дойдубутугар Дьиэ кэргэн, Сахабыт сиригэр оҕо саас сылларыгар анаммыт Удьуор уус дьиэ кэргэн республикатааҕы күрэххэ Майаттан Егоровтар дьиэ кэргэн ийэлэрэ Валентина Владимировна оҕолорунаан кыттан бочуоттаах 3 үрдэл кыайыылаах тахсан 40000 солк үптээх туоһу суругунан наҕараадаланнылар, манна даҕатан эттэххэ айар тутар талааннаах Валентина Владимировна, Петр Петрович Егоровтар Сахабыт Сиригэр биир бастакынан керамиканан дьарыктанан Туойаана мастерской арынан туойтан иһит хомуос эгэлгэтин оңорон таһаарар биир тарбахха баттанар киэн туттар бастың дьиэ кэргэн буолаллар.
Өттүк симэ5э республикатааҕы блиц-күрэххэ биир дойдулаахпыт Хаптаҕай нэһилиэгиттэн Мэңэ Хаңалас улууһун сатабыллаах маастара Лукина Лена Николаевна кыттан чиэстээхтик улууспут аатын көмүскээтэ. Удьаа хамыйах. Көңкөлөй оңоруутугар республикатааҕы блиц-күрэххэ Төңүлүттэн Елисей Андреевич Баишев-Дэлэй Уус уолунаан Айталлыын кыттан Айтал Баишев Кэскиллээх уус, Елисей Баишев Талба талаан анал ааттары ылары ситистилэр.
Дьиэ кэргэн, о5о саас сылларыгар улахан бол5омтону ууран Семейные традиции в народном творчестве республикатааҕы деловой площадка тэрилиннэ, манна биһиги улууспутуттан үс айар талааннаах дьиэ кэргэн: Хаптаҕайтан Александра Юрьевна, Руслан Михайлович Терентьевтар, Майаттан Валентина Владимировна, Петр Петрович Егоровтар, Төңүлүттэн эдэр ыал Сахая, Елисей Баишевтар айар үлэлэрин, дьиэ кэргэн быһыытынан оҕоҕо, үүнэр көлүөнэҕэ саха төрүт уус оңоһуктарын, сиэрин туомун бэйэлэрин тус холобурдарынан тиэрдэри, үөрэтэри олус истиңник кэпсээбиттэрин истээччи дьон сэңээрдилэр, үгүс ыйытыктары биэрдилэр.
Якутия мастеровая быыстапка дьаарбаңңа Сахабыт сирин араас муннуктарыттан норуот маастардарын бастың үлэлэрэ талыллан көрдөрүүгэ туруорбуттарын түмүгүнэн Тимиртэн оңоһуктар хайысхаҕа Төңүлүттэн тимир ууһа СР норуотун маастара Говоров Леонид Прокопьевич 2 үрдэл, Суола Мооруктан төрүттээх эдэр тимир ууһа, СР норуотун маастара Алексей Апросимов Суолаан 1 үрдэл кыайыылаах таҕыстылар.
Сыахайдар хайысхаҕа Бүтэйдээхтэн төрүттээх биир дойдулаахпыт СР уус уран оңоһуктарын маастара Агафья Ивановна Колесова 1 үрдэл кыайыылаах, Кылтан сиэлтэн хайысхаҕа Балыктаахтан СР уус уран оңоһуктарын маастара Березкина Валентина Борисовна, Көмүстэн оңоһуктар хайысхаҕа Төңүлүттэн Аграфена Саввична, Леонид Прокопьевич Говоровтар, Тимиртэн оңоһук хайысхаҕа Төңүлүттэн эдэр тимир ууһа Леонид Говоров, Төрүт иис хайысхаҕа Дьаҥхаады нэһилиэгиттэн СР уус уран оңоһуктарын маастара Артемьева Александра Владимировна, Керамика хайысхаҕа Майаттан Валентина Владимировна, Петр Петрович Егоровтар анал ааттарынан бэлиэтэнэн наҕараадаланнылар.
Бука бары ситиһиилэммит улууспут уран тарбахтаахтарын улахан таһымнаах күрэхтэргэ кыайыыларгытынан итиитик истиңник эҕэрдэлиибит. Үтүө үгэс буолбут Мэңэ Уус айар талааннаахтарын түмэр улуустааҕы быыстапкабыт муус устар ый саңатыгар ыытыллыаҕа, бука бары уран уустарбытын, иистэнньэңнэрбитин киэң далааһыннаах тэрээһиннэрбитигэр күүтэбит.
Васильева Айта
Гавриил Колесов аатынан оройуоннаа5ы норуот айымньытын киинэ Олоңхо Дьиэтин уус уран салайааччыта.
