Рекламный баннер 728x90px main1
ХАРА НЭҺИЛИЭГИТТЭН ТӨРҮТТЭЭХ ЕГОР ТЕРЕНТЬЕВ АРАССЫЫЙА ЧӨМПҮЙҮӨНЭ
Кулун тутар 19-24 күннэригэр Красноярскай куоракка буолбут хотугу многоборьеҕа Арассыыйа чөмпүйэнээтигэр 12 эрэгийиэнтэн 200-чэкэ бастыҥ күүстээх спортсменнар илин-кэлин түһүстүлэр.
Эр дьоҥҥо ыстаныы, сүүрүү, сүгэни, аркааны быраҕыы уонна наартаны ойуу көрүҥнэринэн күөн күрэскэ дойдубут араас муннуктарыттан 54 спортсмен кыттыыны ылбытыттан, биһиги биир дойдулаахпыт Егор Терентьев муҥутуур кыайыылааҕынан таҕыста.
Ону тэҥэ, Саха сирин сүүмэрдэммит хамаандата хамаанданан бастыыр иһин түмүккэ бастыҥ көрдөрүүнү ситиһэн хотугу многоборьеҕа Арассыыйа чөмпүйэнээтин кыайыылаахтарынан ааттаннылар.
Егор Терентьев 1999 сыллаахха балаҕан ыйын 29 күнүгэр Хара нэһилиэгэр күн сирин көрбүтэ.
Харатааҕы спортивнай оскуолаҕа хотугу многоборье көрүҥэр бастакы тириэньэрэ Константин Ширяев уһуйбута. 2017 сыллаахха Саха сирин маастарын нуорматын толорбута. 2021 сыллаахха Альберт Иванов тириэньэрдээх Арассыыйа спордун маастара буолбута. Билигин Чурапчытааҕы физическэй култуура уонна спорт институтун устудьуона.
Тириэньэрэ Альберт Иванов.
Уолбутугар Егорга улууһуҥ, өрөспүүбүлүкэҥ аатын чиэстээхтик көмүскээн дьоһун кыайыыны ситиспиккинэн эҕэрдэни тиэрдэбит!
Инникитин даҕаны бу тэтими ыһыктыбакка үлэлээн-хамсаан, кыайан-хотон өссө үрдүк үрдэллэргэ тахсан иһэргэр баҕарабыт.
Мэҥэ Хаҥалас улууһун дьаһалтатын пресс-сулууспата
204
Рекламный баннер 728x90px main2