XXIV ӨРӨСПҮҮБҮЛҮКЭТЭЭҔИ АҔА КҮРЭҔИН КЫАЙЫЫЛААХТАРА ААТТАННЫЛАР
Муус устар 6, 7 күннэригэр Майа сэлиэнньэтин Ураһалаах алааһыгар XXIV-с өрөспүүбүлүкэтээҕи Аҕа күрэҕэ 2024 тэриллэн ыытылынна.
Манна 16 улуустан уонна Дьокуускай куораттан 19 хамаанда бэрэбинэни суорууга, уот оттон ууну оргутууга, ойбон алларыытыгар, мас хайытааһын, сааһылааһын, остуолбаҕа ыттыы курдук түһүмэхтэринэн илин-кэлин түһүстүлэр, тобуллаҕас өйдөрүн, сымсаларын, сатабылларын, күүстэрин-уохтарын тургуттулар.
Үтүө үгэскэ кубулуйбут Аҕа күнүн көрсө, 24-с төгүлүн ыытыллар тэрээһин үөрүүлээх арыллыытыгар кыттааччылары уонна ыалдьыттары олохтоох баһылык Алексей Неустроев, улуус баһылыгын социальнай уонна имиджевэй бэлиитикэҕэ солбуйааччы Альбина Григорьева, Саха Өрөспүүбүлүкэтин Үлэҕэ уонна социальнай сайдыыга миниистирин солбуйааччы Елена Теплякова, "Аҕалар лигалара" уопсастыбаннай тэрилтэ бэрэссэдээтэлэ Айхал Габышев эҕэрдэлээтилэр.
Ол курдук, бэрэбинэни суоруу - бастакы көрүҥ. Манна аҕа суорар, оҕо суоруллубут маһы анал тэрилинэн иҥнибэккэ ааһарын кээмэйдээн биэрэр. Түмүккэ, Уус Алдантан Руслан, Илья Поповтар бастакы, Сунтаартан Степан, Гром Корниловтар иккис уонна үһүс миэстэҕэ Бүлүүттэн Дмитрий, Дьулусхан Ивановтар буоллулар.
Иккис көрүҥ - кыттааччылар мас хайытан, уот оттон, толору биэдэрэлээх ууну түргэнник оргутуохтаахтар. Манна бастакынан Мэҥэ Хаҥаластан Айаал, Айсен Карамзиннар буоллулар, иккиһинэн Уус Алдантан Руслан, Илья Поповтар, үһүс Анатолий, Арылхан Петровтар Ньурбаттан таҕыстылар.
Үһүс көрүҥ - бэрэбинэни илии эрбиитинэн эрбээн чууркалааһын. Бу түһүмэххэ Амматтан Николай, Аркадий Федоровтар бастакы, Бүлүүттэн Дмитрий, Дьулусхан Ивановтар - иккис уонна үһүс миэстэҕэ Чурапчыттан Сергей, Саян Крыловтар таҕыстылар.
Төрдүс көрүҥ биатлон. Манна 100 миэтэрэ тэйиччиттэн хайыһарынан күрэхтэһэн кэлэн, кыраҕы харахтааҕы быһаараллар. Түмүккэ, бастакы миэстэ - Хаҥаластан Владислав, Святослав Пермяковтар, Уус Алдантан Руслан, Илья Поповтар - иккис миэстэ уонна үһүс миэстэ - Бүлүүттэн Дмитрий, Дьулусхан Ивановтар буоллулар.
Иккис күн бастакы этээбигэр ойбоннорун 2 мүнүүтэ 29 сөкүүндэнэн алларан анал шаблону уган таһаарбыт Мэҥэ Хаҥалас улууһун Дьаҥхаадытыттан Николай, Дамир Поповтар буоллулар.
Иккис миэстэҕэ 2 мүнүүтэ 39 сөкүүндэ бириэмэлээх Хаҥаластан Пермяковтар, үһүс миэстэҕэ 3 мүнүүтэ 6 сөкүүндэлээх Амма улууһуттар Федоровтар таҕыстылар.
Иккис түһүмэххэ аҕалар кэчигирэччи турар мастары түөрт аҥыы хайыттылар. Ол кэнниттэн уолаттар чууркалары хомуйан сааһылаатылар.
Бастыҥ көрдөрүүнү 9 мүнүүтэ 56 сөкүүндэ бириэмэлээх Сунтаар улууһуттан Корниловтар дьиэ кэргэн көрдөрдүлэр. Иккис миэстэҕэ 10 мүнүүтэ 18 сөкүүндэлээх Амма улууһуттан Федоровтар, үһүс миэстэҕэ 10 мүнүүтэ 40 сөкүүндэ бириэмэлээх Мэҥэ Хаҥаластан Поповтар дьиэ кэргэн.
Остуолбаҕа ыттыыга 17 сөкүүндэ уопсай бириэмэлээх Мэҥэ Хаҥалас улууһун Догдоҥотуттан түргэн-тарҕан туттуулаах Айаал, Айсен Карамзиннар дьиэ кэргэн бастаатылар.
Иккиһинэн уопсайа 25 сөкүүндэнэн ыттан тахсыбыт Мэҥэ Хаҥалас Дьаҥхаадытыттан Поповтар дьиэ кэргэн, үсүһүнэн 26 сөкүүндэ бириэмэлээх Таатта улууһуттан Жегусовтар таҕыстылар.
Икки күннээх тыҥааһыннаах куоталаһыы түмүгүнэн Амма улууһуттан бастыҥ көрдөрүүлээх Николай, Аркадий Федоровтар өрөспүүбүлүкэтээҕи Аҕа күрэҕэ 2024 МУҤУТУУР КЫАЙЫЫЛААХТАРЫНАН таҕыстылар, 300 000 суумалаах туоһу суругунан наҕараадаланнылар.
Иккис миэстэ Бүлүү улууһуттан Дмитрий, Дьулусхан Ивановтар буоллулар, бириистэригэр 150 000 суумалаах туоһу суругу туттулар.
Үһүс миэстэҕэ Уус Алдан улууһуттан Руслан, Илья Поповтар 100 000 суумалаах сэртипикээтинэн наҕараадаланнылар.
Улуус баһылыга Дмитрий Тихонов туруорбут убаһаҕа туоһу суругун баһылыгы социальнай уонна имиджевэй бэлиитикэҕэ солбуйааччы Альбина Григорьева куорат усулуобуйатыгар олорон оҕолорун төрүт дьарыкпытыгар угуйар дьиэ кэргэҥҥэ, эдэр, кэскиллээх Алтан уолга уонна кини аҕатыгар Александр Лебедевтарга үөрүүлээх быһыыга-майгыга туттарда.
Улууспут аатын чиэстээхтик көмүскээн 5 буолбут Догдоҥоттон Айаал, Айсен Карамзиннарга, 6 миэстэ буолбут Дьаҥхаадыттан Николай, Дамир Поповтарга улуус дьаһалтатын бириистэрэ ананнылар.
Саха Өрөспүүбүлүкэтин аҕаларын лигатын бэрэссэдээтэлэ Айхал Габышев Айсен, Исай Индеевтарга Лиэнскэй хамаандатыгар булт маҕаһыыныттан бирииһин туттарда.
СӨ Үлэҕэ уонна социальнай сайдыыга миниистирин солбуйааччы Елена Теплякова Якутия авиакомпания хайа баҕар хайысхаҕа сөмөлүөтүнэн икки киһиэхэ босхо көтөр кыаҕы биэрэр сэртипикээтин Өлүөхөмэ улууһуттан Демьян, Демьян Петровтарга уунна.
Барҕарыы пуонда бэрэссэдээтэлэ Афанасий Постников 30 000 суумалаах туоһу суругун Орто Халыма улууһуттан кытта кэлэ сылдьар Владислав, Ярослав Сивцевтарга туттарда.
Водоканал АУо генеральнай дириэктэрэ Анатолий Кырджагасов Үөһээ Бүлүүттэн Петровтарга, Кэбээйиттэн Каримовтарга, Горнайтан Кубаровтарга бензиининэн эстэр эрбиилэри бэлэх уунна.
Күрэх сүрүн тэрийээччитэ Варвара Кулаковская Дьокуускайтан Беляевтарга, Намтан Семеновтарга, Мэҥэ Хаҥаластар Карамзиннарга уу харчынан бириэмийэлэри туттарда.
Бары кыттыбыт дьиэ кэргэттэр араас анал ааттары ыланнар, өйдөбүнньүк бириистэринэн наҕараадалананнар, сибиэһэй салгыҥҥа дуоһуйа күрэхтэһэннэр, астынан-дуоһуйан, тэрийээччилэргэ махтанан тарҕастылар.
Күрэҕи тэрийсибит улуустааҕы социальнай бэлиитикэ салалтата "Майа сайына", "Айсуши" тэрилтэлэргэ, Сардаана Васильевна Охлопковаҕа, "Майа сэлиэнньэтэ" тыа сирин түөлбэтин дьаһалтатыгар, психологическай киин улуустааҕы филиалын үлэһиттэригэр, бэтэрээннэр Сэбиэттэригэр уонна бары күүс-көмө, өйөбүл буолбут дьоммутугар махталларын биллэрэллэр.
Уол оҕо аҕатын үтүө холобур оҥостон сиэрдээх-туомнаах, сатабыллаах киһи киһитэ буолан улаатан тахсан, бэйэтин дьиэ кэргэнин тэринэн суон дурда, эрэллээх эркин, халыҥ хахха буоларын көҕүлүүр үгэс буолбут күрэх сыллата үүнэн-сайдан, кэҥээн-сириэдийэн иһэригэр бигэ эрэллээхпит.
Мэҥэ Хаҥалас улууһун дьаһалтатын пресс-сулууспата
