Рекламный баннер 728x90px main1
УЛУУСПУТ КИИНИГЭР УЛУУ КЫАЙЫЫ 79 СЫЛЫН КӨРСӨ
Бүгүн улууспут киинигэр Аллараа Бэстээххэ илин эҥэр улуустарын хорсун хоодуот буойуннара
Аҕа дойду сэриитигэр ыҥырыллан барбыт аартыктарын сиригэр
Улуу Кыайыы 79 сылын көрсөр өрөгөйдөөх күнү бэлиэтиир үөрүүлээх, долгутуулаах миитин тэрилиннэ.
Улуус баһылыга Дмитрий Тихонов, Аллараа Бэстээх бөһүөлэгин баһылыга Юрий Колмаков, Ил Түмэн Сир сыһыаннаһыыларыгар, айылҕа баайыгар уонна экологияҕа сис кэмитиэтин бэрэссэдээтэлэ Андрей Находкин, оройуон дьокутааттарын Сэбиэтин бэрэссэдээтэлэ Иннокентий Андросов,
Мэҥэ Хаҥалас уонна Уус Алдан улуустарын байыаннай комиссара Аял Петров, байыаннай дьайыы кыттыылаахтарын ааттарыттан Давид Малеев бу күн дириҥ суолтатын бэлиэтээн туран уоттаах, төлөөннөөх тылларынан бэтэрээннэри, мустубут бар дьону эҕэрдэлээтилэр.
Эйэлээх, сырдык олох уйгутун, дойдубут инники кэскилин туһугар бэйэни харыстаммат күүстээх үлэҕэ, кыргыһыы толоонугар сырдык тыыннарын толук уурбут биир дойдулаахтарбыт сырдык өйдөбүллэригэр кэриэстэбил мүнүүтэтин чуумпута иһийдэ.
Дойдубут устуоруйатыгар көмүс буукубаларынан суруллубут дириҥ суолталаах күн сүгүрүйүү бэлиэтинэн үйэлээх уот уонна сахалартан бастакы Сэбиэскэй Сойуус Дьоруойа үрдүк ааты сүкпүт киэн туттар биир дойдулаахпыт Федор Кузьмич Попов пааматынньыгар сибэкки дьөрбөлөрө уурулуннулар.
Харах уулаах ыар сылларга биһиги дьоллоох олохпут туһугар эйэни уонна көҥүл олоҕу түстээбит эһэлэрбит, эбэлэрбит сырдык ааттарыгар, хорсун быһыыларыгар бараммат барҕа махтал, өлбөт-сүппэт албан аат!
Мэҥэ Хаҥалас улууһун дьаһалтатын пресс-сулууспата
338
Рекламный баннер 728x90px main2