Рекламный баннер 728x90px main1
МЭҤЭ ХАҤАЛАСКА – ЫРЫА КҮНЭ
Бүгүн Майа сэлиэнньэтигэр Ырыа күнүгэр аналлаах “Ырыа кырдала” тэрээһин ыытылынна. Бу күн Сахабыт сиригэр 2022 сыллаахтан Ил Дархан Айсен Николаев Ыйааҕынан ырыаҕа уһуйуу уонна култуура суолтатын билинии соругунан бэлиэтэнэр.
Ырыа – олохпут аргыһа буолара чахчы. Кини кэрэ эйгэни төрүттүүр, ыарахан кэмҥэ дьон-сэргэ сүргэтин көтөҕөр, эрэли саҕар, сомоҕолуур ураты күүстээх иэйии буолар. Бүгүн Комсомольскай болуоссакка ырыа ураты абылаҥа дьону-сэргэни хото түмтэ, ырыа-тойук оройуттан тутулунна.
Ырыаны таптыыр, сэргиир биир дойдулаахтарбытын, кэрэ эйгэтин кэрэхсээччилэри
улуус баһылыгын бастакы солбуйааччы Василий Михайлов, социальнай уонна имиджевэй бэлиитикэҕэ солбуйааччы Альбина Григорьева, тутууга солбуйааччы Василий Филиппов, Майа сэлиэнньэтин баһылыгын социальнай бэлиитикэҕэ солбуйааччы Вячеслав Санников, салалта салайааччылара эҕэрдэлээтилэр уонна халаан уутуттан эмсэҕэлээбиттэргэ көмөнү оҥорууга үп-харчы хомуйуутугар тус кылааттарын киллэрэн туран, бар дьоннорун кыттыһарга ыҥырдылар.
Түгэнинэн туһанан улууспут олохтоохторун, ыалдьыттарын Ырыа күнүнэн итиитик-истиҥник эҕэрдэлиибит! Ырыаны, муусуканы таптаан истиҥ, ыллааҥ, айыҥ-тутуҥ!
Мэҥэ Хаҥалас улууһун дьаһалтатын пресс-сулууспата
112
Рекламный баннер 728x90px main2