Рекламный баннер 728x90px main1
Халаан уутуттан улаханнык эмсэҕэлээбит Нам улууһугар ыам ыйын 20 күнүттэн саҕалаан олохтоохторбутуттан гуманитарнай көмө хомулунна.
Манна, улуустааҕы социальнай бэлиитикэ салалтатын дьиэтигэр, улууспут бары нэһилиэктэрэ, тэрилтэлэрбит, уопсастыбаннай түмсүүлэрбит, урбаанньыттарбыт, биирдиилээн дьоммут туора турбакка көхтөөхтүк кытыннылар. Бородууктаттан саҕалаан, утуйар таҥас, улахан киһи, оҕо таҥастара, дьиэ маллара, үөрэнэр тээбириннэр, эмп-томп итиэннэ харчынан көмө хомулунна. Улууспут бэтэринээрдэрэ сүөһүгэ, сылгыга аналлаах үс хоппо эми ыыттылар. Итиэннэ “Ырыа ыллыгынан” аахсыйа кэнсиэртэн уонна түмсүүлэртэн, тэрилтэлэртэн, биирдиилээн дьонтон уопсайа 310 150 солкуобай суума буолла.
Бүгүн көмөнү тобус-толору тиэммит оптуобус Нам улууһугар айаннаата. Улууспут баһылыгын бастакы солбуйааччы Василий Михайлов илдьэн туттарар.
Бары тэҥинэн ылынан, көмө аахсыйаҕа кыттыспыт дьоммутугар-сэргэбитигэр барҕа махталбытын тиэрдэбит.
Норуот күүһэ - көмүөл күүһэ!
Мэҥэ Хаҥалас улууһун дьаһалтатын пресс-сулууспата
188
Рекламный баннер 728x90px main2