МЭҤЭБИЛЛЭР КҮРЭХПИТ ТҮГЭННЭРИТТЭН
Үгүс дьон биһирэбилин ылбыт, хапсаҕайга уонна мас тардыһыытыгар нэһилиэктэр икки ардыларыгар "МэҥэбиллЭр" күрэхпитин быйыл үһүс төгүлүн ыыттыбыт.
Улууспут ааттаах-суоллаах бөҕөстөрө, мадьынылара, бастыҥ ыччаттарбыт, бэтэрээннэрбит кэлэн, сытыы хапсыһыыларга хамаанданан бастыыр иһин күөн көрүстүлэр.
Биэс хамаанда киирсибититтэн, самыыр аннынан күн устата ыытыллан ордук күүстээхтэр, бастыҥнар быһаарылыннылар.
Муҥутуур кыайыылааҕынан үһүс сылын Горькай сопхуос холбоһуктаах хамаандата ааттанна, иккис миэстэ Ленин аатынан сопхуос уонна үһүс миэстэ Дьоруой Попов аатынан сопхуос холбоһуктаах хамаандата буоллулар. Күрэхпит солбуллубат ыытааччыта уолбут Дьулустан Захаров, сүрүн судьуйанан Алексей Попов тэрээһини үрдүк таһымҥа ыыттылар.
Уолаттарбытыгар, кыттыбыт бары хамаандаларга төлөннөөх эҕэрдэбин, өссө да үрдүк, чаҕылхай ситиһиилэри баҕарабын! Инникитин даҕаны бу күрэхпитин ыытыахпыт, балаһыанньаҕа уларытыылары киллэрэргэ туһуламмыт этиилэри үөрэтэн көрүөхпүт.
Дмитрий Тихонов