Өйдөбүнньүк уонна кутурҕан күнэ
1941 сыл бэс ыйын 22 күнүгэр сарсыарда түөрт чааска сэрэтиитэ суох фашисткай Германия дойдубутугар соһуччу саба түспүтэ.
83 сыл анараа өттүгэр бу күнтэн Аҕа дойду уоттаах сэриитэ саҕаланан 1418 күн устата тохтоло суох ыытыллыбыта, 26 мөлүйүөн кэриҥэ дьон олоҕун быспыта.
Сэрии ыар сылларыгар бүтүн Сэбиэскэй Сойуус дьоно биир сомоҕо санаанан Кыайыыны уһансыбыттара.
Бу күн кырыктаах өстөөҕү кытары хабыр хапсыһыыга хорсун быһыыламмыт, эйэлээх олох туһугар олохторун толук уурбут, сут-кураан ыар кэмнэргэ тыылга күүстээх үлэҕэ сылдьан тыыннара быстыбыт дьоммут сырдык кэриэстэригэр ананар.
Ким да умнуллубат, туох да умнуллубат!
Мэҥэ Хаҥалас улууһун дьаһалтатын пресс-сулууспата