Рекламный баннер 728x90px main1
Тыа хаһаайыстыбатын эйгэтигэр үлэлии-хамсыы сылдьар туруу үлэһит дьон, ытык бэтэрээннэр Нөөрүктээйи нэһилиэгин ыһыахтыыр ытык сиригэр бэс ыйын 26 күнүгэр түмүстүлэр.
Тыа хаһаайыстыбатынан дьарыктаныы киһиттэн элбэх сыраны, дьаныары эрэйэр. Төрөөбүт сирдэрин дьиҥнээхтик таптыыр эрэ дьон олохторун бүтүннүү бу эйгэҕэ аныыллар. Өбүгэлэртэн ыла илдьэ кэлбит, бу идэни сайыннарар, көҕүлүүр дьоммутугар, бары үлэһиттэргэ бэриниилээх, сыралаах үлэлэригэр махтанан туран, Үрүҥ Тунах Ыһыаҕынан улууспут баһылыга Дмитрий Тихонов, Ил Түмэн дьокутааттара - сир сыһыаннаһыыларыгар, айылҕа баайыгар уонна экологияҕа сис кэмитиэтин бэрэссэдээтэлэ Андрей Находкин, тыа сиригэр уонна аграрнай бэлиитикэ сис кэмитиэтин бэрэссэдээтэлэ Александр Атласов, улуустааҕы тыа хаһаайыстыбатын салалтатын салайааччыта Иннокентий Семенов, ыҥырыылаах ыалдьыттар эҕэрдэлээтилэр.
Өлгөм үүнүүлээх, өҥ-быйаҥ сайын буоларын туһугар Аал уоту алгыстаах алаадьынан айах туттулар,оһуохайдаан, тэрилтэлэринэн спорт уонна араас куонкурустарга кыттыыны ылан, бииргэ алтыһан, үөрэн-көтөн тарҕастылар.
Үтүө дьоммутугар-сэргэбитигэр тапталлаах дойдубут туһугар таһаарыылаах үлэни, үрдүк көрдөрүүлэри-ситиһиилэри баҕарыаххайыҥ, ыраас төрүт аспытын тэнитэ-дэлэтэ турдуннар!
Мэҥэ Хаҥалас улууһун дьаһалтатын пресс-сулууспата
196
Рекламный баннер 728x90px main2