Рекламный баннер 728x90px main1
ТӨҤҮЛҮГЭ САҤА ТААС ДЬИЭ МАҤНАЙГЫ СЫБААЙАТА ТҮСТЭ
Бүгүн, от ыйын 3 күнүгэр, Төҥүлү нэһилиэгэр «Хаарбах дьиэттэн дьону көһөрүү» федеральнай бырагыраама нөҥүө 35 кыбартыыралаах олорор дьиэ тутуллуута саҕаламмытын бэлиэтээн бастакы сыбаайа түһэриитин үөрүүлээх тэрээһинэ ыытылынна.
Бу бэлиэ түгэнинэн олохтоохтору улуус баһылыгын бастакы солбуйааччы Василий Михайлов, Төҥүлү нэһилиэгин баһылыга Петр Эверстов, улуустааҕы тутуу салалтатын начаалынньыга Илья Григорьев, «Аурис» ХЭТ генеральнай дириэктэрэ Алексей Колочев эҕэрдэлээтилэр.
Эбийиэккэ бэдэрээччит тэрилтэнэн «Аурис» ХЭТ үлэлиир. Дьиэ каркаснай-монолитнай технологиянан тутуллар, түөрт этээстээх, икки подъездаах, 35 кыбартыыралаах, автономнай гаас оттуктаах, техническэй этээстээх, маҕаһыыннаах буолуохтаах, уопсай иэнэ 1600 кв.м. Былаан быһыытынан эбийиэк 2025 сыл атырдьах ыйыгар туттарыллара күүтүллэр.
Саҥа дьиэҕэ уопсайа сэттэ хаарбах дьиэттэн 34 ыал көһөн киириэхтээх.
Олохтоохтор 70-с сыллардаах тутуллуулаах эргэрбит дьиэттэн көһөөрү бу бэлиэ күҥҥэ долгуйан, үөрэн-көтөн туралларын биллэрдилэр.
Мэҥэ Хаҥалас улууһун дьаһалтатын пресс-сулууспата
197
Рекламный баннер 728x90px main2