Рекламный баннер 728x90px main1
12 ЧААСТАН ОРДУК СҮТЭ СЫЛДЬЫБЫТ ОҔОНУ ЭТЭҤҤЭ БУЛЛУЛАР
Бэҕэһээ, от ыйын 23 күнүгэр, Мэлдьэхси нэһилиэгэр 15:00 чаас саҕана 2016 сыллаах төрүөх уол оҕо биллибэт хайысханан сүттэ диэн биллэриллибитэ.
Социальнай ситимнэринэн иһитиннэрии тарҕанан бэрт суһаллык олохтоохтор, чугас сытар нэһилиэктэртэн баҕа өттүнэн кэлбит дьон полиция үлэһиттэригэр күүс-көмө буолан көрдүү тахсыбыттара.
Киэһэ 19:00 чаас саҕана Дьокуускай куораттан анал быыһыыр сулууспа үлэһиттэрэ кэлэн көрдөстүлэр.
Тохтоло суох тараахтаан көрдөөһүн түмүгэр, дьиэтиттэн 2,5 килэмиэтир ыраах турар мыраан үрдүгэр, түүн 3 чаас саҕана оҕо уһуктан кутталыттан ытаабытын истэннэр сүүрэн тиийэн буллулар.
12 чаастан ордук сүтэ сылдьыбыт оҕону Аллараа Бэстээххэ «Саха сирин тимир суоллара» тэрилтэҕэ үлэлиир Элизар Иванов булла.
Оҕо чугас дьоно, олохтоох дьаһалта туора турбакка күүс-көмө буолбут, тэҥҥэ долгуйбут, кыттыспыт бар дьоҥҥо улахан махталларын биллэрэллэр.
Көрдөөһүҥҥэ уопсайа 95 киһи: 65 олохтоох нэһилиэнньэ, 23 полиция, 7 быыһыыр сулууспа үлэһиттэрэ кыттыыны ыллылар.
Мэҥэ Хаҥалас улууһун дьаһалтатын пресс-сулууспата
192
Рекламный баннер 728x90px main2