Рекламный баннер 728x90px main1
ТИЭЛИГИ ТЫАТЫН БАҺААРА БОХСУЛУННА
Бэҕэһээ, от ыйын 23 күнүгэр, 1-кы Наахара нэһилиэгин тыатыгар күнүс 12:40 чааска бэлиэтэммит ойуур баһаара киэһэ 21:30 чааска бохсулунна.
Уон биир «Авиалесохрана» тэрилтэ үлэһиттэрэ, ону тэҥэ түөрт олохтоох дьон күүс-көмө буоллулар.
Баһаар биричиинэтинэн чаҕылхан охсубут маһа диэн быһаарылынна, уопсайа 2,5 га сиргэ тарҕана сырытта, салгыы барбатын гына булууктаах тыраахтарынан суһаллык төгүрүччү эргийэн тохтоттулар.
Ытыктабыллаах улууспут олохтоохторо, отчуттар-масчыттар, айылҕаҕа сынньана тахсааччылар, сир астааччылар!
Улууспутугар үрдүк IV кылаастаах баһаар үөскүүр куттала, өрөспүүбүлүкэбитигэр баһаартан сэрэхтээх буолууга ыксаллаах быһыы балаһыанньата биллэриллэн турар кэмигэр аһаҕас уоту туттартан, бөҕү-сыыһы уматартан булгуччу туттунуоҕуҥ диэн ыҥырабыт.
Олорор сирбитигэр-уоппутугар, айылҕабытыгар харыстабыллаахтык сыһыаннаһыаҕыҥ!
Мэҥэ Хаҥалас улууһун дьаһалтатын пресс-сулууспата
227
Рекламный баннер 728x90px main2