САҤА ҮӨРЭХ ДЬЫЛЫГАР КИИРЭР УЛАРЫЫЙЫЛАР
Үөрэх дьыла саҕаланара номнуо ый хаалла. Атырдьах ыйыгар оскуолаҕа барар оҕолордоох ыаллар тэтэрээт, кинигэ, уруучука, таҥас-сап ылынар түбүгэр түһэллэр
Онтон быйылгы үөрэх дьылыгар туох саҥа уларыйыылар киириэхтэрэй?
Балаҕан ыйын 1 күнүттэн Арассыыйа бары оскуолаларыгар:
«Технология» биридимиэтэ «Труд» диэн ааттанан биэс булгуччулаах муодулларынан: “Оҥорон таһаарыы уонна технология”, “Таҥастааһын уонна аһылык бородууктатын технологията”, “Көмпүүтэр графиката. Черчение”, “Робототехника”, “3-D моделирование, прототипирование, макетирование”
уонна үс талыллар муодулларынан: “Автоматизированнай систиэмэ”, “Сүөһү иитиитэ”, “Үүнээйини олордуу” үлэ ыытыллыаҕа.
Дойду министиэристибэтэ үлэ уруогар быһаарбыт муодулларыттан көрдөххө, уруок аныгы халыыбынан барара сабаҕаланар.
8-11 кылаас үөрэнээччилэригэр «Куттала суох буолуу төрүтэ уонна төрөөбүт дойдуну көмүскээһин» саҥа биридимиэт киириэҕэ. Манна оҕолору дойдуга бэриниилээх буолууга, бэйэни хайдах харыстанарга, бастакы суһал көмөнү оҥорууга үөрэтиэхтэрэ.
«Обществознание» уруога 6-8 кылаас бырагырааматыттан сотуллан былырыыҥҥыттан 9 кылаастан саҕаламмыта.
Быйылгыттан 9 кылаастарга уонна техническэй профильлаах 10-11 кылаастарга «Черчение» биридимиэтэ киирэр.
«Семьеведение» уруога 10-11 кылаас үөрэнээччилэригэр дьиэ кэргэн укулаатын, сыаннастарын өйдөтөр сыаллаах тэриллэн ыытыллыаҕа.
Уруок кэмигэр радио-төлөпүөн сибээһинэн туттуу сокуонунан булгуччу бобулунна
Физкультура уруогар саҥа муодуллар: гольф, биатлон, ушу, чирлидинг, тиэннис уо.д.а. дьарыктара эбиллэллэр. Ону тэҥэ «Танцевальный спорт» көрүҥэ киирэн биэриэҕэ.
Саҥа киирэр уларыйыылар оҕо оскуолатын бүтэрэригэр тирэҕирэр билиини ылан талар идэтин чопчу билэр буолан тахсарыгар төһүү буолара күүтүллэр.
Мэҥэ Хаҥалас улууһун дьаһалтатын пресс-сулууспата