Бүгүн, атырдьах ыйын 22 күнүгэр, бүтүн Арассыыйаҕа Судаарыстыбаннай былаах күнэ бэлиэтэнэр
Арассыыйа үс өҥнөөх (үрүҥ, халлаан күөҕэ, кыһыл) былааҕа 1991 сыллаахха атырдьах ыйын 22 күнүгэр РСФСР Үрдүкү Сэбиэтинэн бигэргэтиллибитэ.
Судаарыстыбаннай былаах хас биирдии киһиэхэ көҥүл олох, тутулуга суох буолуу, история кэрэһитин, кэнчээри ыччакка Ийэ дойдуга тапталы иҥэрии ытык бэлиэтинэн буолара саарбаҕа суох, ону тэҥэ дойдубут сайдыытын туһугар турууласпыт үгүс көлүөнэ дьоммут эҥкилэ суох үлэлэрин, хорсун быһыыларын уонна албан ааттарын кытта быһаччы ситимнээх.
Былаахха аан бастакынан суолта биэрбит киһинэн Петр I аҕата, XVII үйэҕэ Москва ыраахтааҕыта Алексей Михайлович буолар. 1667 сыллаахха “Орел” диэн бастакы байыаннай хараабылга өрө көтөҕүллүбүтэ. Петр I суолталаах ис хоһонноон, судаарыстыбаннай бэлиэ быһыытынан туттар буолбута.
Былаас тутула уларыйдаҕын аайы, судаарыстыба былааҕа эмиэ уларыйа сылдьыбыта.
Оттон 1991 сыллаахха атырдьах ыйын 22 күнүгэр РСФСР Үрдүкү Сэбиэтэ Арассыыйа үс өҥнөөх былааҕын национальнай былааҕынан билинэр туһунан уурааҕы ылыммыта. 1994 сыллаахха атырдьах ыйын 20 күнүгэр РФ Бэрэсидьиэнэ Борис Ельцин “Судаарыстыба былааҕын туһунан” ыйаах таһаарбытынан, атырдьах ыйын 22 күнэ Судаарыстыбаннай былаах күнүнэн олохтоммута.
Былаах өҥнөрүн суолталара: үрүҥ - сырдык санааны, эйэни, ситиһиини, халлаан күөҕэ - ыраас ууну, эрэли, бэриниилээх буолууну, кыһыл – күүһү, эрчими туоһулууллар.
Элбэх норуоту түмэн, үтүө үлэһит дьону уруйдаан, инникигэ эрэли саҕан, өрүү күөрэччи тэлимнии тур, Модун Арассыыйабыт былааҕа!
Мэҥэ Хаҥалас улууһун дьаһалтатын пресс-сулууспата