Рекламный баннер 728x90px main1
УЛУУС ДЬАҺАЛТАТЫН ПЛАНЕРКАТЫТТАН СОНУННАР
Нэдиэлэтээҕи планерканы улуус баһылыгын бастакы солбуйааччы Василий Михайлов салайан ыытта.
Арассыыйа Ис дьыалаҕа министиэристибэтин Мэҥэ Хаҥаластааҕы отдела иһитиннэрбитинэн, ааспыт нэдиэлэ устата улууспутугар 5 суол быһылаана, 1 олохтон туорааһын, дьон эчэйиитигэр 18 дьыалата, 14 административнай боротокуол туолла. ГИБДД үлэһиттэринэн уопсайа 771 массыына бэрэбиэркэлэннэ, Төҥүлү нэһилиэгэр 3, Майа сэлиэнньэтигэр 4 ДНД үлэлээтилэр.
Баһаары утары сулууспа иһитиннэрбитинэн, Төҥүлүгэ гаражтаах чааһынай диьэҕэ уот туруута бэлиэтэннэ, нэдиэлэ устата 2 баһаарынай-тактическай үөрэхтэр ыытылыннылар, 3 “ложнай вызов” киирдэ, 3 эбийиэккэ баһаарынай сигнализация туруоруутун үлэтэ барда.
Улуустааҕы киин балыыһа кылаабынай бырааһын дааннайынан, бүгүҥҥү туругунан улууспутугар 10 киһи ковидынан ыалдьыыта бэлиэтэнэр, стационарнай эмтэниини 1 оҕо, амбулаторнай эмтэниини 13 улахан киһи ыла сылдьаллар.
“Роспотребназор” салаайааччыта этэринэн, күн бүгүн улууспутугар 6 оскуола, 2 оҕо уһуйаана 100% карантиҥҥа сабыллан олороллор. Тымныйан ыалдьыыттан (ОРВИ) быһыы 100% оҥоһулунна.
Показать ещё
СӨ Дьиэ-уот хомунаалынай хаһаайыстыбатын министиэристибэтин улуустааҕы филиалын салайааччыта Иннокентий Яковлев иһитиннэрбитинэн, үлэ былааннаммыт тэтиминэн баран иһэр. Чох таһыытын былаанынан Бөкөҕө - 154 тонна, Нуораҕанаҕа - 499 тонна, Моорукка - 405 тонна, Балыктаахха - 700 тонна, Хорообукка - 68 тонна тиийдэ, үүммүт нэдиэлэҕэ бу үлэ салҕанар. Ааспыт нэдиэлэ биир сүрүн боппуруоһа - Матта сэлиэнньэтигэр уу таһар массыына хааччыллыыта, “Сахаспецтранс” тэрилтэ улуустааҕы филиалын кытта үлэ түмүгүнэн быһаарылынна.
Тыа хаһаайыстыбатын салалтатын салайааччыта Иннокентий Семенов иһитиннэрбитинэн, тыа хаһаайыстыбатын салаатынан субсидияны биэриигэ докумуонннары тутуу, бэрээдэктээһин үлэтэ ыытылынна. Баатараҕа сүөһү хотонугар уу таһар массыына боппуруоһа быһаарылынна, быыстала суох үлэ барарыгар усулуобуйа тэрилиннэ. СӨ тыатын хаһаайыстыбатын министиэристибэтиттэн бородуукта набора кэлэн, бу күннэргэ улууспутуттан быстах хомуурга ыҥырыллыбыт дьоммут дьиэ кэргэттэригэр тиэрдиллиэҕэ диэн эттэ.
990
Рекламный баннер 728x90px main2