Тохсунньу 20 күнүгэр Нөөрүктээйи нэһилиэгэр саҥа кинигэ сүрэхтэннэ. Кинигэ Нөөрүктээйи нэһилиэгин бочуоттаах олохтооҕо, Гражданскай килбиэн мэтээл хаһаайына, МПЧ-7 баһаарынай чаас салаайааччытынан үлэлээбит Петров Алексей Михайлович туһунан чугас дьонун, кэлиэгэлэрин, бииргэ үөрэммит доҕотторун истиҥ иһирэх тыллардаах ахтыыларыттан таҥыллан оҥоһулунна. Кинигэни Николай Федоров баһылыктаах Нөөрүктээйи нэһилиэгэ тыа сирин түөлбэтин дьаһалтата үбүлээн таһааттарда.
Үлэ үтүө холобурун көрдөрбүт Алексей Михайлович Петров ыччат сааһыттан комсомольскай үлэҕэ-хамнаска эриллэн, спортивнай күрэхтэһиилэргэ, художественнай самодеятельноска актыыбынайдык кыттан, ыччат дьону бэйэтин тула түмпүтэ. Бу чулуу хаачыстыбалара кэлин салайааччы быһыытынан үүнэн-сайдан тахсыытыгар олук буолбуттара.
Нөөрүктээйи курдук улахан нэһилиэккэ баһаарынай чаас наадатын Алексей Михайлович өрдөөҥҥүттэн өйдөөн, туруорсубут, олохтоох дьаһалтаны кытта бииргэ үлэлээн аһылларын ситиспит киһинэн буолар. Онон нэһилиэкпитигэр баһаары утары охсуһар сулууспа тэрилтэ тэриллиитигэр кини улахан өҥөлөөх. Кини МПЧ-7 тэрилтэҕэ салайааччынан 23 сыл эҥкилэ суох үлэлээбитэ. Үлэтэ-хамнаһа ситиһиилээх буоларын инниттэн сатабыллаах, далааһыннаах быһаарыныылары ылынан кини салайар кэмигэр тэрилтэтэ Саха Өрөспүүбүлүкэтин бастыҥ баһаарынай чааһа диэн үрдүк ааты ылары ситиспитэ.
Алексей Михайлович норуотун туһугар үлэлээбит үлэтэ үйэлээх буолуоҕа, кини сырдык аатыгар ананан тахсыбыт кинигэ нэһилиэкпит дьоно умсугуйан ааҕар кинигэлэрэ буолуоҕа, кэлэр кэнчээри ыччаппытыгар кэпсээҥҥэ сылдьыаҕа диэн эрэнэбит.
Колосова Нина Ивановна, Нөөрүктээйи нэһилиэгин саҥа көлүөнэ модельнай бибилэтиэкэтин сэбиэдиссэйэ
Информационный сайт Нижний Бестях. Позиция редакции не всегда совпадает с точкой зрения авторов. При перепечатке текстов либо ином использовании текстовых материалов с настоящего сайта на иных ресурсах в сети Интернет гиперссылка на источник обязательна.
В титульной части сайта использованы фотографии Светланы Ивановой, лицензия CC-BY-SA-3.0