Олунньу 28 күнүгэр, СӨ Ил Дарханын уонна бырабыыталыстыбатын Дьаһалтатын Тыл сайдыытын боппуруорстарын сүрүннүүр салалта салайааччыта, тыл билимин хандьыдаата Римма Романовна Жиркова биһиги улууспутугар Майа, Ходоро, Хара нэһилиэктэригэр сылдьан көрсүһүүлэри тэрийдэ, сирдэр-уоттар, тэрилтэлэр ааттарын, ыйар суруктары икки судаарыстыбаннай тылларынан суруллууларын көрдө. Улахан хардыы оҥоһуллубутун бэлиэтээтэ.
Күн иккис аҥаарыгар улууспут Тыл сайдыытын боппуруостарын сүрүннүүр хамыыһыйатын мунньаҕар үлэлэстэ.
Мунньаҕы улуус баһылыга Дмитрий Тихонов салайан ыытта. Ону тэҥэ улуус баһылыгын социальнай, имиджевэй бэлиитикэҕэ солбуйааччы Альбина Григорьева уонна тыл хамыыһыйатын чилиэннэрэ, тэрилтэ салайааччылара кыттыыны ыллылар.
Тыллар туһунан сокуон үлэтин, тиэрминнэри дорҕоону уларытан буолбакка, сахалы тустаах тылларынан тылбаастааһын, сахалыы тылынан ааҕыыны сайыннарыы суолларын, тыл сайдыытыгар дьиэ кэргэн сүрүн оруоллааҕын, оҕону ийэ иһигэр сылдьыаҕыттан саха тылыгар угуйуу, сахалыы тыллаах уһуйааннарга, оскуолаларга, дьиэ-кэргэҥҥэ, эдэр төрөппүттэргэ өйдөтүү үлэтин ыытар тустааҕын тула ырытыы таҕыста.
Римма Романовна Өрөспүүбүлүкэ Ил Дарханын өйөбүлүнэн, СӨ Тыл сайдыытын судаарыстыбаннай бырагыраамматыгар бүддьүөттэн 100 мөл. солк. керүллэр диэн иһитиннэрдэ.
Саха тыла судаарыстыбаннай тыл быһыытынан туттуллар таһымын, эйгэтин кэҥэтии уонна үрдэтии, олоххо киэҥник туттуллуутун хааччыйыы боппуруостарыгар үлэлэһэр Ил Дархан өрөспүүбүлүкэ судаарыстыбаннай уонна официальнай тылларын чөл хаалларыы, үөрэтии уонна сайыннарыы Кэнсиэпсийэтин сырдатта.
Хас биирдии улууска сирдэр, нэһилиэнньэлээх пууннар, учаастактар, тэрилтэлэр ааттарын биир чуолкай ыстандаарка, реестргэ кииллэрэн уларытыы улэтэ куускэ барыахтаа5ын эттэ.
Бу курдук, төрөөбүт тылбыт сүппэтин, симэлийбэтин туһугар хардарыта үлэ, былаан ылыллыыта барбыта кэскиллээх суол буолар.
МТ дьаһалтатын пресс-сулууспата
Информационный сайт Нижний Бестях. Позиция редакции не всегда совпадает с точкой зрения авторов. При перепечатке текстов либо ином использовании текстовых материалов с настоящего сайта на иных ресурсах в сети Интернет гиперссылка на источник обязательна.
В титульной части сайта использованы фотографии Светланы Ивановой, лицензия CC-BY-SA-3.0