Бүгүн, кулун тутар 9 күнүгэр, Майа сэлиэнньэтигэр Д.Ф. Ходулов аатынан Култуура киинигэр дьон-сэргэ тоҕуоруһа мустан, Уһук Илиҥҥи регионнарга Куорат табыгастаах эйгэтин тэрийии федеральнай бырагыраама куонкуруһугар кыттарга Улуу Кыайыы Монуменын саҥардан оҥоруу бырайыагар куоластыыр улахан тэрээһин буолан ааста.
Тэрээһин бастакы чааһыгар бырайыак тула санаа атастаһыыта, этиилэри киллэрии түһүлгэтэ тэрилиннэ. Бырыгараама туһунан сиһилии LETO куорат эйгэтин боппуруостарыгар компетенция киинин салайааччыта Ирина Маркина, киин салайааччытын солбуйааччыта Александра Улинова, СӨ Архитектураҕа уонна куорат тутуутугар салалтатын сүрүн исписэлииһэ Элен Романова билиһиннэрдилэр. Аһаҕас түһүлгэҕэ мустубут ыччат бырайыакка баҕа санааларын, бэйэлэрин көрүүлэрин биэс хамаандаҕа арахсан үлэлээтилэр.
Тэрээһин иккис аҥаарыгар улууспут баһылыга Дмитрий Тихонов уонна Майа сэлиэнньэтин баһылыга Алексей Неустроев олохтоохтор түмсүүлээхтик кэлбиттэригэр, бэйэлэрин этиилэрин киллэрбиттэригэр истиҥ махтал тылларын эттилэр. Улуустааҕы бырайыактыыр салаа салайааччыта Мария Егорова бырайыакка сүрүннээн туох өттүгэр болҕомто ууруллубутун сырдатта. Биэс хамаанда салайааччылара бырайыак тула бүгүҥҥү үлэлэрин түмүгүн дьон-сэргэ иннигэр кэпсээтилэр.
Барыта 395 олохтоох мустан, бырайыак сүрүн тутулугар сөбүлэһэллэрин уонна өйүүллэрин биллэрэн, биир санаанан илиилэрин өрө уунан бигэргэттилэр. Бырайыакпыт аатыгар 377 киһи куоластаан, Кыайыы аартыга диэн этиигэ тохтоотулар.
Бырайыакка туспа көрүүлээх дьон этиилэргитин кулун тутар 13 күнүгэр диэри Майа дьаһалтатын электроннай почтатыгар amosm2010@mail.ru ыытыаххытын сөп.
Мэҥэ Хаҥалас улууһун дьаһалтатын пресс-сулууспата
Информационный сайт Нижний Бестях. Позиция редакции не всегда совпадает с точкой зрения авторов. При перепечатке текстов либо ином использовании текстовых материалов с настоящего сайта на иных ресурсах в сети Интернет гиперссылка на источник обязательна.
В титульной части сайта использованы фотографии Светланы Ивановой, лицензия CC-BY-SA-3.0