Баатара нэһилиэгэр кулун тутар 25 күнүгэр сахалартан бастакы Сэбиэскэй Сойуус Дьоруойа Федор Кузьмич Попов аатын сүгэр орто оскуола офицер-баспытаатала, хотугу многоборьеҕа Арассыыйа спордун маастара, бойобуой дьайыы кэмигэр хорсун быһыытын иһин Ф.К. Попов аатынан Патриот сүрэҕэ Бочуот бэлиэ хаһаайына, Эр санаа уордьаныгар түһэриллибит Владислав Эдуардович Тарабукин сырдык кэриэһигэр Баатара Баатырдара өрөспүүбүлүкэтээҕи байыаннай-патриотическай күрэхтэһии ыытылынна.
Кадеттар биир кэккэнэн хаамыыга, ыйытыыларга хоруйдааһыҥҥа, аптамаат сааны ыһан таҥыыга, аптамаат маҕаһыынын толорууга, буулдьанан ытыыга, нартаны ыстаныыга уонна эт-хаан өттүнэн бэлэмнээх буолуу көрүҥнэригэр күөн көрүстүлэр. Түмүккэ Баатара оскуолатын кадеттара үчүгэй бэлэмнээхтэрин көрдөрөн бастыҥнарынан ааттаннылар. Иккис миэстэ Уус Алдан улууһун Мүрү 1 -дээх орто оскуолатын уонна үһүс миэстэ Ходоро орто оскуолатын үөрэнээччилэрэ ылан грамоталарынан, мэтээллэринэн наҕараадаланнылар.
Тэрээһиҥҥэ улуус баһылыгын тутууга солбуйааччы Василий Филиппов, олохтоох баһылык Иван Матвеев, Доблесть бойобуой дьаһыылар бэтэрээннэрин түмсүүтүн салайааччыта Николай Семенов, Дьокуускай куорат бэтэрээннэрин сэбиэтин бэрэссэдээтэлэ Николай Тряпша, Мэҥэ Хаҥалас улууһун бэтэрээннэрин сэбиэтин бэрэссэдээтэлэ Маргарита Михайлова кыттыыны ыллылар. Бу күрэхтэһии үүнэр көлүөнэ ыччаппыт чэгиэн-чэбдик туруктаах, чөл олохтоох, төрөөбүт дойдуларыгар ытыктабыллаах, бэриниилээх, чиҥ иитиллиилээх, көнө сүрүннээх буола сайдан тахсалларыгар төһүү буолар.
Мэҥэ Хаҥалас улууһун дьаһалтатын пресс-сулууспата
Информационный сайт Нижний Бестях. Позиция редакции не всегда совпадает с точкой зрения авторов. При перепечатке текстов либо ином использовании текстовых материалов с настоящего сайта на иных ресурсах в сети Интернет гиперссылка на источник обязательна.
В титульной части сайта использованы фотографии Светланы Ивановой, лицензия CC-BY-SA-3.0