Муус устар 11 күнүгэр, Аллараа Бэстээххэ улуус дьаһалтатын мунньахтыыр саалатыгар СӨ Бырабыыталыстыбатын бэрэссэдээтэлин бастакы солбуйааччы Дмитрий Садовников салайыылаах суһал түгэни сэрэтэр, суох оҥорор уонна баһаартан куттал суох буолуутун хааччыйар хамыыһыйа халааны сэрэтэр үлэлэрин ыытыы боппуруостарын тула мунньаҕы ыытта.
СӨ Бырабыыталыстыбатыттан нэһилиэнньэ олоҕор-дьаһаҕар куттал суох буолуутун хааччыйар судаарыстыбаннай кэмитиэт бэрэссэдээтэлин бастакы солбуйааччы Иннокентий Андросов, СӨ нэһилиэнньэтин олоҕор-дьаһаҕар куттал суох буолуутун хааччыйар судаарыстыбаннай кэмитиэт, Арассыыйа ыксаллаах быһыы-майгы министиэристибэтин Саха сиринээҕи сүрүн салаатын, тыа хаһаайыстыбатын министиэристибэтин, суол сулууспатын, уу хаһаайыстыбатын, бэрэстэбиитэллэрэ кытыннылар.
Хамыыһыйа чилиэннэринэн улуус баһылыгын бастакы солбуйааччы Василий Михайлов, ууга барыы куттала суоһуон сөптөөх нэһилиэктэр баһылыктара уонна туһааннаах тэрилтэлэр салайааччылара, начаалынньыктара, исписэлиистэрэ кытыннылар.
Мунньаҕы СӨ Бырабыыталыстыбатын бэрэссэдээтэлин бастакы солбуйааччы Дмитрий Садовников иилээн-саҕалаан ыытта.
СӨ күнү-дьылы уонна тулалыыр эйгэни кэтээн көрүү сулууспатын салайааччытын солбуйааччы Вячеслав Шехиров кулун тутар ыйга нуорматтан таһынан элбэх хаар түстэ, үрэхтэр уулара тахсар кутталлара баар, биһиги улууспутугар уу таһымын кэтээн көрөр 9 пост турар диэн иһитиннэрдэ.
Росводресурсы Ленскэйдээҕи уу ресурсатын федеральнай ааҕыныстыба салалтатын салайааччытын солбуйааччы Федот Пермяков, СӨ экология, айылҕаны туһаныы уонна ойуур хаһаайыстыбатын министиэристибэтин уу сыһыаныгар департамент салайааччытын солбуйааччы Зинаида Васильева, СӨ тыа хаһаайыстыбатын сир мелиорациятын уонна уунан хааччыйыы салалтатын салайааччы бастакы солбуйааччы Михаил Лоскин сааскы халааны бохсорго мууһу кэбирэтии, мууһу хараардыы үлэтэ ыытылла турарын кэпсээтилэр.
Улуус баһылыгын бастакы солбуйааччы Василий Михайлов: Ууга барар кутталлаах уон нэһилиэнньэлээх пуун, ол иһигэр 322 чааһынай, 11 уопсай дьиэлэр, 897 киһи, онтон 246 оҕо, 1 хаарбах туруктаах, 2 социальнай суолталаах эбийиэктэр, 1 сайыҥҥы лааҕыр. Улуус сиригэр киирсэр 2 харыы тахсыан сөптөөх сирэ баар, харыы буолар түгэнигэр Хаптаҕай, Ороссолуода, Нөөрүктээйи, Дьаҥхаады, Дойду нэһилиэктэригэр уонна Аллараа Бэстээх бөһүөлэгэр ууга барар куттала суоһуур. Суола үрэх туолар түгэнигэр Алтан, Моорук нэһилиэктэрэ, Мыла үрэх 2-с Наахара, Чаарда үрэх Тараҕай нэһилиэгэ кутталланаллар. 9 нэһилиэнньэлээх пууҥҥа ынах сүөһүнү, сылгыны үрдүк сиргэ көһөрүү былааннанна, - диэн улуус туругун уонна ылыллыбыт миэрэлэри дакылааттаата.
Нөөрүктээйи, Ороссолуода, 2-с Наахара, Моорук нэһилиэктэрин баһылыктара уу ылар түгэнигэр туох үлэ бэлэмнэнэ сылдьарын билиһиннэрдилэр. Түмүккэ бу сыл хаар, муус халыҥыттан, буолбут баһаардартан сылыктаатахха, уу таһыма хаһааҥҥытааҕар да үрдүк көрдөрүүгэ тахсыан сөп, онон барытыгар бэлэмнээх буоларгыт ирдэнэр диэн этилиннэ.
Мэҥэ Хаҥалас улууһун дьаһалтатын пресс-сулууспата
Информационный сайт Нижний Бестях. Позиция редакции не всегда совпадает с точкой зрения авторов. При перепечатке текстов либо ином использовании текстовых материалов с настоящего сайта на иных ресурсах в сети Интернет гиперссылка на источник обязательна.
В титульной части сайта использованы фотографии Светланы Ивановой, лицензия CC-BY-SA-3.0