УЛУУСПУТ ҮӨРЭНЭЭЧЧИЛЭРИГЭР ҮӨРЭХ ДЬЫЛЫН ТҮМҮКТҮҮР СЛЕТ ЫЫТЫЛЫННА

УЛУУСПУТ ҮӨРЭНЭЭЧЧИЛЭРИГЭР ҮӨРЭХ ДЬЫЛЫН ТҮМҮКТҮҮР СЛЕТ ЫЫТЫЛЫННА

Ыам ыйын 14 күнүгэр 2-ис Наахара нэһилиэгэр Улуу Кыайыы 80, Арассыыйаҕа Аҕа дойдуну көмүскээччилэр, национальнай Дьоруойбут Баһылай Манчаары төрөөбүтэ 220 сылыгар анаммыт улууспут үөрэнээччилэригэр үөрэх дьылын түмүктүүр "Будь в движении" слет ыытылынна. Тэрийээччилэринэн улуустааҕы үөрэҕирии салалтата, "Мэҥэ кэскилэ" улуустааҕы патриотическай иитиигэ тирэх киин, И.И. Платонов аатынан Наахара орто оскуолата итиэннэ улуустааҕы сокуоннай саастарын ситэ илик оҕолор дьыалаларын көрөр уонна кинилэр бырааптарын көмүскүүр хамыыһыйа буоллулар. Уопсайа 21 оскуолаттан 200 кэриҥэ оҕо кыттыыны ылбыта бэлиэтэннэ.

Улуустааҕы үөрэҕирии салалтатын салайааччытын солбуйааччы Михаил Петров, "Мэҥэ кэскилэ" патриотическай иитиигэ тирэх киин салайааччыта, "Оҕо саас сирдьиттэрэ" федеральнай бырайыак улуустааҕы координатора Марианна Манастырева, И.И. Платонов аатынан Наахара орто оскуолатын дириэктэрэ Павел Старостин слет кыттыылаахтарыгар эҕэрдэ тылларын эттилэр, ситиһиилээх күнү баҕардылар.

И. И. Платонов аатынан Наахара орто оскуолатын актыбыыстара ылбаҕай ырыаларынан, хомоҕой хоһооннорунан тэрээһин үөрүүлээх чааһын киэргэттилэр.

Слет түөрт түһүмэххэ наарданан ыытылынна. Ол курдук:

-оскуолалар слет сүрүн сыалын таба көрөн бивуактарын киэргэтиилэрин сыаналааһын,

-бэйэни билиһиннэриигэ оҕолор идиэйэлэрин, төһө көхтөөхтөрө көрөөһүн,

-миэстэтигэр видео (тэттик киинэ) оҥоруутугар күрэх,

-сокуоннай саастарын ситэ илик оҕолор дьыалаларын көрөр уонна кинилэр бырааптарын көмүскүүр хамыыһыйа, профилактика уорганнара түһүмэхтэринэн хамаандаларга анал бириистээх, сүүрүүлээх-көтүүлээх оонньууну тэрийэн ыыттыылар. Биир түһүмэҕинэн улуустааҕы дартс федерациятын салайааччыта Евгений Птицын хамаанданан уонна биирдиилээн бастыыр иһин дартс көрүҥэр күрэх тэрийэн ыытта.

Түмүккэ Гран-при үрдүк аатын Н.Д. Неустроев аатынан Бэдьимэ орто оскуолатын "Бэдьимэ кэскилэ" оҕо уопсастыбаннай түмсүүтэ ылары ситистэ.

Бастакы миэстэ И.М. Романов аатынан Төхтүр орто оскуолатын "Дьаҥхаады кэскилэ" оҕо уопсастыбаннай түмсүүтэ,иккис миэстэ М.Е. Попов аатынан Аллараа Бэстээх орто оскуолатын "Школьная республика" уонна Кеша Алексеев аатынан Хаптаҕай орто оскуолатын "Пульс" оҕо уопсастыбаннай түмсүүллэрэ, үһүс миэстэ В.П. Ларионов аатынан Майа орто оскуолатын "Ларионовцы", А.А. Пахомов аатынан Тиэлиги орто оскуолатын "Кэскил" итиэннэ И.Г. Игнатьев аатынан Хара орто оскуолатын "Ситим" оҕо уопсастыбаннай түмсүүлэрэ буоллулар.

Ардахха мэһэйдэппэккэ оҕолорбут, дьоммут-сэргэбит үгэскэ кубулуйбут пионерия саҕаттан ыытыллар слетка сүрдээх көхтөөхтүк сырыттылар, айылҕалыын алтыһан, сынньанан, үөрэн-көтөн тарҕастылар.

Мэҥэ Хаҥалас улууһун дьаһалтатын пресс-сулууспата