«КҮН ҮҤКҮҮТЭ» ИЛИН ЭҤЭР УОННА ТҮӨЛБЭ ОҺУОХАЙЫН КҮРЭҔЭ ЫЫТЫЛЫННА

«КҮН ҮҤКҮҮТЭ» ИЛИН ЭҤЭР УОННА ТҮӨЛБЭ ОҺУОХАЙЫН КҮРЭҔЭ ЫЫТЫЛЫННА

Бүгүн, ыам ыйын 23 күнүгэр, Аллараа Бэстээх бөһүөлэгэр Улуу Кыайыы үбүлүөйдээх 80 сылыгар анаммыт Амма, Мэҥэ Хаҥалас, Таатта, Уус Алдан уонна Чурапчы улуустара кыттыылаах «Күн Үҥкүүтэ» Илин эҥэр уонна түөлбэ оһуохайын күрэҕэ ыытылынна.

Тэрээһин Өлүөнэ эбэбит кытылыгар «Туос тууйастар» аахсыйаттан саҕаланна. Эйэлээх, сырдык олох уйгутун, дойдубут инники кэскилин туһугар олохторун толук уурбут, кыргыһыы толоонугар дойдубутун хорсуннук көмүскээбит Дьоруойдарбыт сырдык өйдөбүллэригэр кэриэстэбил мүнүүтэтин чуумпута иһийдэ.

Бэлиэ күн улуус баһылыга Дмитрий Тихонов, ыаллыы сытар улуустарбыт салалталарын бэрэстэбиитэллэрэ мустубут бар дьону Улуу кыайыы үбүлүөйдээх 80 сылынан эҕэрдэ тылларын эттилэр. Дьоллоох, уйгулаах олох иһин турууласпыт аҕа көлүөнэ дьоммутугар куруук махталлаахпытын, кинилэр үтүө холобурдарыгар үлэлээн-хамсаан төрөөбүт дойдубутун салгыы сайыннарар ытык иэстээхпитин бэлиэтээтилэр.

Аҕа дойду Улуу сэриитигэр Илин эҥэр улуустартан сэриигэ ыҥырыллан барбыт эр санаалаах, хорсун майгылаах биир дойдулаахтарбытыгар сүгүрүйэн, биэс улуус уран тарбахтаахтара, айар-тутар дьоҕурдаах үтүө дьоммут илиилэрин сылааһыгар угуттанан оҥоһуллубут Улуу Кыайыы 80 сылын бэлиэтээн 80 туос тууйаһы арыылаах алаадьынан толорон Өлүөнэ эбэбит долгунун устун ыыттыбыт.

Салгыы Кыайыы Болуоссатыгар сүгүрүйүү бэлиэтинэн үйэлээх уокка сибэкки дьөрбөлөрө уурулуннулар.

«Күн Үҥкүүтэ» Илин эҥэр уонна түөлбэ оһуохайын күрэҕин үөрүүлээх арыллыытыгар улуус баһылыга Дмитрий Тихонов, култуураҕа уонна духуобунай сайдыыга салалта салайааччыта Анна Исакова, Г.Г.Колесов аатынан Олоҥхо дьиэтин салайааччыта Евдокия Иванова ыраахтан-чугастан кэлбит ыалдьыттарбытын оһуохай күрэҕин үтүө түһүлгэтэ саҕаламмытынан эҕэрдэ тылларын эттилэр, наҕараадалары туттардылар.

Саха Өрөспүүбүлүкэтин култууратын миниистирэ Афанасий Ноев саха норуотун баай ис хоһоонноох култууратын үрдүктүк тутан илдьэ сылдьар үтүө дьоммутугар эҕэрдэ тылын эттэ, күрэх кыттыылаахтарыгар ситиһиини баҕарда.

«КҮН ҮҤКҮҮТЭ» оһуохай күрэҕэ үс түһүлгэнэн тэнийэн ыытылынна. Оҕолор, ыччаттар уонна аҕам саастаах оһуохайдьыттар оһуохайы оройуттан ыланнар күөн күрэхтэстилэр, дьону-сэргэни сэҥээртилэр.

«Күн Үҥкүүтэ» Илин эҥэр уонна түөлбэ оһуохайын күрэҕин түмүгэ:

Оҕолорго: бастакы миэстэ-Колодезникова Алена (Таатта), иккис миэстэ- Лена Степанова (Амма), үһүс миэстэ-Домира Дорофеева (Уус Алдан).
Ыччат саастаахтарга: бастакы миэстэ-Айта Васильева (Таатта), иккис миэстэ – Елена Тотонова (Чурапчы), үһүс миэстэ – Иван Иванов (Таатта).
Аҕа саастаахтарга: бастакы миэстэ – Афанасий Попов (Таатта), иккис миэстэ – Татьяна Неустроева (Мэҥэ Хаҥалас), үһүс миэстэ-Игнатий Слепцов (Уус Алдан).

Тэрээһин ыалдьыттарбыт итиэннэ улууспут дьоно эҕэрдэ кэнсиэрдэринэн түмүктэннэ. Эһиилги сылга "Күн үҥкүүнэ" Илин эҥэр уонна түөлбэ оһуохайын күрэҕэ Кыыс Аммаҕа ыытыллара быһаарылынна.

Мэҥэ Хаҥалас улууһун дьаһалтатын пресс-сулууспата