ТАБАҔАТААҔЫ ОҔО УСКУУСТУБАТЫН ОСКУОЛАТЫГАР ПАВЕЛ ПАВЛОВИЧ  ЕГОРОВ ААТА ИҤЭРИЛИННЭ

ТАБАҔАТААҔЫ ОҔО УСКУУСТУБАТЫН ОСКУОЛАТЫГАР ПАВЕЛ ПАВЛОВИЧ  ЕГОРОВ ААТА ИҤЭРИЛИННЭ
 
Бүгүн, ыам ыйын 30 күнүгэр, Тараҕай нэһилиэгэр үөрүүлээх бэлиэ күн үүннэ. Ол курдук, РФ үөрэҕириитин туйгуна, СӨ култууратын үтүөлээх үлэһитэ, СӨ култууратын туйгуна, "Төлөн" эр дьон, "Иэйии" дьахталлар народнай ансаамбылларын, Табаҕатааҕы народнай хор төрүттээччитэ, 1982-2019 сылларга Табаҕатааҕы оҕо ускуустубатын оскуолатын дириэктэрэ, Мэҥэ Хаҥалас улууһун, Тараҕай нэһилиэгин бочуоттаах олохтооҕо, Тараҕай нэһилиэгин "Ытык сүбэ" уопсастыбаннай хамсааһын бэрэссэдээтэлэ Павел Павлович Егоров аата Табаҕатааҕы оҕо ускуустубатын оскуолатыгар иҥэрилиннэ.
 
Үөрүүлээх күн Тараҕай нэһилиэгин баһылыга Юрий Порядин, улуус баһылыгын социальнай уонна имиджевэй бэлиитикэҕэ солбуйааччы Татьяна Егорова, улуус култуураҕа уонна духуобунай сайдыыга салалтатын исписэлииһэ Спиридон Григорьев, П.П. Егоров аатынан Табаҕатааҕы оҕо ускуустубатын оскуолатын дириэктэрэ Артур Кузьмин итиэннэ ытык киһибит Павел Павлович чугас дьоно-сэргэтэ эҕэрдэ тылларын эттилэр.
 
Оҕо ускуустубатын оскуолатыттан үгүс көлүөнэ ыччат үүнэн-сайдан, кэрэ эйгэтигэр уһуйуллан, баай өйдөөх-санаалаах, айар-тутар талааннах, чэгиэн туруктаах, көхтөөх дьон буола үүнэн тахсалларыгар баҕардылар.
 
Бэлиэ күн күндү киһибит Павел Павлович мустубут бар дьоҥҥо долгутуулаах, бэлиэ күн үөрүүтүн үллэстэ кэлбиттэригэр махталын биллэрдэ, үлэҕэ-үөрэххэ ситиһиилэри баҕарда.
 
Итиэннэ бу күн оҕо ускуустубатын оскуолатын иитиллээччилэрэ, Павел Павлович үөрэнээччилэрэ кыттыылаах эҕэрдэ кэнсиэр тэрилиннэ.
 
Бука барыгытыгар айымньылаах үлэҕитигэр, үөрэххитигэр ситиһиини, чэгиэн-чэбдик туругу, дьолу, бары үтүөнү баҕарабыт! Ылыммыт сыалгыт ыпсан, тутуспут суолгут тупсан истин диэн баҕа санаабыт бастыҥын аныыбыт!
 
Мэҥэ Хаҥалас улууһун дьаһалтатын пресс-сулууспата