Бүгүн ыам ыйын 18 күнэ - Аан дойдутааҕы түмэл күнүнэн күндү биир идэлээхтэрбитин ис сүрэхтэн эҕэрдэлиибит!

Бүгүн ыам ыйын 18 күнэ - Аан дойдутааҕы түмэл күнүнэн күндү биир идэлээхтэрбитин ис сүрэхтэн эҕэрдэлиибит!
Баҕарабыт айымньылаах үлэҕитигэр дьоһун ситиһиилэри, чэгиэн-чэбдик доруобуйаны, дьолу-соргуну.

Түмэл күнүн бэлиэтээн, ыам ыйын 16 күнүгэр Р.Г. Васильев аатынан улуустааҕы кыраайы үөрэтэр түмэл аһаҕас аан күнүн биллэрбитэ. Бу күн ыытыллыбыт кэккэ тэрээһиннэргэ көхтөөх кыттыыны ылбыт көрөөччүлэрбитигэр, күндү ыалдьыттарбытыгар, кэллиэгэлэрбитигэр барҕа махталбытын тиэрдэбит.

Ол курдук, сылын ахсын ыытыллар «Түмэлгэ бэлэх» акция быыстапка турда.

Быйылгы тэрээһиҥҥэ ураты, эрдэ көрдөрүүгэ турбатах "Харыстаа. Сириэдий. Сырдат." диэн сэдэх быыстапка үөрүүлээх арыллыытынан саҕаланна. Түмэл пуондатыттан 1890 сыллаах 86 кинигэлээх Ф.А. Брокгауз, И.А. Ефрон Энциклопедия тылдьыттара толору хомуурунньуга көрдөрүүгэ турда.

Ону тэҥэ, сүрүн тэрээһининэн, улууспут нэһилиэктэрин түмэллэригэр "Сэдэх экспонат" күрэх ыытылынна. Манна Нөөрүктээйи, Дьанхаады, Төҥүлү, Лоомтука, Бүтэйдээх түмэллэрэ көхтөөх кыттыыны ыллылар, өйдөбүнньүк бэлэхтэринэн, туоһу суруктарынан наҕараадаланнылар.

Салгыы, 16 чаастан квест оонньуу ыытылынна. Манна Майатааҕы В.П. Ларионов аатынан орто оскуолатын 8 а, б кылаас үөрэнээччилэрэ күөн көрүстүлэр. Оонньуу сүрүн уратытынан - түмэл куруһуогун үөрэнээччилэрин сыллааҕы түмүктүүр үлэлэрэ, оҕолорго тэрээһин ыытыы буолла.
Бастакы түһүмэххэ - улууспут 95 сылын чэрчитинэн, устуоруйа хаамыытын кэрэһэлиир түмэл сүдү экспонаттарын көрдөөһүн буолла. Иккис түһүмэххэ - Улуу Кыайыы 80 сылыгар аналлаах викторина хайысхалаах эмиэ тэттик квест аастылар.
Түмүккэ, 8 "а" кылаас хамаандата бастакынан түһүмэхтэри ааһан, кыайыылаҕынан таҕыста. Түмэл аатыттан анал туоһу суруктары, өйдөбүнньүк сэмэй бэлэхтэри туттардылар.

Киэһээ өттүгэр "Симэх - омук баайа" лекциянан түмүктэннэ.

Эһиилги түмэл күнүгэр көрсүөххэ диэри!

Видео: Мэҥэ Хаҥалас улууһун пресс-кииниттэн