Бүгүн киэн туттар, холобур оҥостор киһибит – тыыл, үлэ бэтэрээнэ, сэрии сылларын оҕото, «Мэҥэ Аат» Бочуот кинигэтигэр киирбит ытык киһибит, Мөҥүрүөн нэһилиэгин...

Бүгүн киэн туттар, холобур оҥостор киһибит – тыыл, үлэ бэтэрээнэ, сэрии сылларын оҕото, «Мэҥэ Аат» Бочуот кинигэтигэр киирбит ытык киһибит, Мөҥүрүөн нэһилиэгин Бочуоттаах олохтооҕо Екатерина Николаевна Гурьева үбүлүөйдээх 95 сааһын бэлиэтиир.

Екатерина Николаевна оҕо сааһа сэрии ыар кэмнэригэр түбэһэн, улахан дьону кытта тэҥҥэ Улуу Кыайыыны уһансыбыта. Ытык киһибит сааһын тухары төрүт дьарыкпыт, тыабыт хаһаайыстыбата инникилээх, дьоммут-сэргэбит бигэ туруктаах буолалларын туһугар улахан үтүөлээх.

М. Горькай аатынан сопхуоска икки сыл ньирэй көрөөччүнэн, уон сыл ыанньыксытынан, уон икки сыл техник-осеменаторынан, икки сыл үүт тутааччынан, операторынан уонна 5 сыл эдэрдэргэ настаабынньыгынан таһаарыылаахтык, үтүө суобастаахтык үлэлээбитэ. Күндү киһибит үтүө холобурунан үгүс көлүөнэ ыччат осеменатор идэтин баһылаабыттара.

Екатерина Николаевна улахан дьиэ кэргэн ийэтэ, 5 оҕоҕо күн сирин көрдөрөн, атахтарыгар туруоран, билигин 15 сиэн, 22 хос сиэн эйэҕэс эбэтэ. Кини оҕолоро, ыччаттара билигин норуот бары хаһаайыстыбатыгар таһаарыылаахтык үлэлии-хамсыы, айа-тута сылдьаллар.

Үтүөкэн киһибит Екатерина Николаевна!

Сыралаах, таһаарыылаах үлэҕэр истиҥник махтанан туран, тус бэйэҕэр уонна дьиэ кэргэҥҥэр чэгиэн-чэбдик туругу, этэҥҥэ буолууну, эйэлээх халлааны, бары үтүөнү баҕарабын! Чугас дьонуҥ тапталларынан, истиҥ сыһыаннарынан арыаллатан өссө да уһун үйэлэн диэн алгыс тылбын аныыбын.