«ДЬОРУОЙ СУОЛУНАН» СПОРТИВНАЙ-ПАТРИОТИЧЕСКАЙ МАРАФОН ЫЫТЫЛЫННА

«ДЬОРУОЙ СУОЛУНАН» СПОРТИВНАЙ-ПАТРИОТИЧЕСКАЙ МАРАФОН ЫЫТЫЛЫННА

От ыйын 25-27 күннэригэр Улуу Кыайыы 80 сылыгар аналлаах сахаттан Бастакы Сэбиэскэй Сойуус Дьоруойа Федор Кузьмич Попов төрөөбүт дойдутугар, Баатара нэһилиэгэр, “Дьоруой суолунан” спортивнай-патриотическай марафон ыытылынна.

Бу марафон «Муус устар» өрөспүүбүлүкэтээҕи ыччат бэстибээлин чэрчитинэн ыытыллыбыт «Росмолодежь» куонкуруһун кыайан, 245 000 солкуобай грант ылан үрдүк таһымнаахтык тэриллэн ааста. Бырайыак ааптара - Мария Сосина, Баатара орто оскуолатын хаһаайыстыбаҕа сэбиэдиссэйэ, бырайыак куратора - Василина Лукина, Саха Сирин Общественнай палататын патриотическай иитии боппуруостарын хамыыһыйатын бэрэссэдээтэлэ, «Дойду ситимэ» общественнай түмсүүгэ Мэҥэ Хаҥаластан төрүттээх ыччаттары кытта үлэлэһэр хайысха салайааччыта.

Тэрээһин үөрүүлээх аһыллыытыгар улуус дьаһалтатын үлэтин тэрийэр уонна кадрдары салайар салаа салайааччыта Станислав Захаров, СӨ ыччат уонна социальнай коммуникацияҕа миниистирин солбуйааччы Александр Максимов, судаарыстыбаннай уонна уопсастыбаннай диэйэтэл, СӨ норуотун хаһаайыстыбатын үтүөлээх үлэһитэ, "Доҕордоһуу" уордьан кавалера, Баатара, Төҥүлү, Нөөрүктээйи нэһилиэктэрин, Санкт-Петербург куорат Петровскай уокуругун, Мэҥэ Хаҥалас улууһун бочуоттаах олохтооҕо, педагогическай наука кандидата, "Манчаары дойдута – Мин дойдум" бэлиэ хаһаайына Матвей Васильевич Мучин, Баатара нэһилиэгин баһылыга Дмитрий Акимов эҕэрдэ тылларын, баҕа санааларын эттилэр.

Арассыыйа Дьоруойдара Дмитрий Куценко уонна Николай Соболев бу тэрээһиҥҥэ кыттыыны ылбыттара бэлиэ түгэнинэн буолла. Кинилэр күн устата марафону арыйдылар, Ф.К. Попов түмэлигэр, төрөөбүт алааһыгар ыалдьыттаатылар.

Марафоҥҥа барыта 6 ыччат хамаандата кыттыыны ылла: улууспутуттан 1-кы Баатара уонна Баатара нэһилиэктэрин холбоһуктаах хамаандата, «Моорук ыччаттара», социальнай бэлиитикэ үлэһиттэрин «Манчаары ыччаттара», АУо “Сахатранснефтегаз” тэрилтэ ыччатын сүбэтэ, Мэҥэ Хаҥалас уонна Нам улуустарын гаазтыыр участоктар холбоһуктаах хамаандалара уонна устудьуоннар этэрээттэриттэн «Мамонт» хамаандата.

Балаһыанньанан 5 көрүҥҥэ күрэхтэстилэр: викторина, триатлон (Тиэрэ үрэҕи харбаан туорааһын, мэһэйдэри ааһыы уонна салгын саанан ытыы күрэҕэ), костерга чээй оргутуута, хотуурунан от охсуу, ынах ыаһын.

Уопсай түмүккэ 3 миэстэни Мэҥэ Хаҥалас уонна Нам улуустарын гаазтыыр участоктар холбоһуктаах хамаандалара, 2 миэстэни АУо “Сахатранснефтегаз” тэрилтэ ыччатын сүбэтэ уонна муҥутуур кыайыылааҕынан 1-кы Баатара уонна Баатара нэһилиэктэрин холбоһуктаах хамаандата ыллылар. Кыттааччылар бары бириистэринэн, кубоктарынан, мэтээллэринэн наҕараадаланнылар.

Марафон Аҕа дойду Улуу сэриитин Дьоруойдарын үйэтитэр үтүө өйдөбүнньүк буолар, кэлэр кэнчээри ыччаттары түмэр, успуорду, чөл олоҕу, төрөөбүт дойдуга тапталы көҕүлүүр үтүө үгэстээх үүнэ-сайда турарыгар баҕарабыт.

Тэрийээччилэргэ, кыттааччыларга үлэҕитигэр, олоххутугар ситиһиилэри, чэгиэн доруобуйаны, дьолу, сырдык санааны баҕарабыт!

Мэҥэ Хаҥалас улууһун дьаһалтатын пресс-сулууспата