Уопсастыба кыттыылаахтара Тааттаҕа ситиһиилэннилэр

Уопсастыба кыттыылаахтара Тааттаҕа ситиһиилэннилэр

Хайа да киһиэхэ болҕомто, алтыһыы улахан суолталаах. Эбиитин истибэт дьоҥҥо ол хайдах курдук наадалааҕын туһааннаах эрэ киһи өйдүөн сөп.

Сыл устата ыытыллар араас тэрээһиннэри куоттарбат туһугар кыһаллабыт. Киһи биир кыһалҕалааҕын, санаалааҕын көрүстэҕинэ, ирэ-хоро кэпсэттэҕинэ санаата кэҥиир, соҕотох курдук  санаммат, тирэхтэнэр, эрэллэнэр. Истибэт дьон бэйэлэрэ туһунан эйгэлээхтэр. Туспа туттар тыллаахтар, алпаабыттаахтар, бэйэ-бэйэлэрин кытта олус өйдөһөллөр.

Бу күннэргэ Мэҥэ Хаҥалас, Таатта, Уус Алдан улуустарын истибэттэр уопсастыбаларын чилиэннэрэ Таатта сиригэр, көрсөн бэртээхэй күннэри атаардыбыт. Тааттатааҕы истибэттэр уопсастыбаларын  бэрэссэдээтэлэ Светлана Дмитриевна  Чөркөөх олохтоохторун кытта саламааттаах алаадьынан айах туттуллар. Ол кэннэ итии чэйинэн, минньигэс  аһынан күндүлээтилэр. Үс чаас устата Чөркөөх мусуойун көрдүбүт. Хонор сирбитигэр, Ытык Күөл тумэлигэр тиийэн, итии чэй, миин иһэн тото-хана аһаатыбыт. Билсэн, оонньоон-көрүлээн, дуоһуйа үҥкүүлээн, билсэн-көрсөн, бэрт үчүгэйдик хонон турдубут.

Иккис күммүтүгэр күммүт-дьылбыт туран биэрбитэ үөрдэр. Түөрт көрүҥҥэ күрэхтэһэ илин-кэлин түһүстүбүт. Коронхолга Дмитрий Колосов, Андрей Цыпандин (Тарат), Маргарита Пепе (Лоомтука), хабылыкка, хаамыскаҕа Зинаида Иванова (Аллараа Бэстээх), Дмитрий Колосов, Маргарита Пепе, дуобакка Михаил Петров, Раиса Никифорова (Бөкө), дартска Галина Ксенофонтова, Заредина Сосина, Дмитрий Колосов (Майа) бириистээх миэстэлэргэ тигистилэр.

Улууспут социальнай управлениетын салайааччытыгар Иван Шестаков күүс-көмө буолбутугар улахан махталбытын тиэрдэбит. Куруутун бу курдук, Илин эҥэрдэр тутуспутунан билсэн, уопут атастаһан көрсөрбүт олус үчүгэй. Таатталарга истиҥник көрсүбүттэригэр улахан махталлаахпыт.

Елизавета Иванова, улуустааҕы истибэттэр уопсастыбаларын бэрэссэдээтэлэ